Ընդդիմության երթի մասնակիցներից մեկին տարել են շտապօգնության մեքենայով. ականատեսներ

ԵՐԵՎԱՆ, 19 փետրվարի. /Նովոստի-Արմենիա/. Նախագահական ընտրությունների երկու ամյակի կապակցությամբ երթի ելած ցուցարարներից մեկին տարել է շտապ օգնության մեքենան:

Ինչպես հայտնում է «Նովոստի-Արմենիա» գործակալությանը թղթակիցը, Ոստիկանության հետ երթի մասնակիցների բախման արդյունքում տուժած Սարգիս Ղազարյանին տարել է շտապօգնության մեքենան, մեկ այլ մասնակցի՝ Վահագն Գևորգյանին ոստիկանությունը ձերբակալել է:  

Ավելի ուշ նրան ազատ են արձակել, և ինչպես անձամբ պատմել  է նա լրագրողներին, նրա հետ բացատրական զրույց են վարել ակցիային մասնակցելու նպատակների մասին, հետո բաց թողել հենց նույն վայրում, որտեղ բռնել էին:

Բանակցությունների արդյունքում ընդդիմության երթը շարունակվեց, և ցուցարարներն ուղղվեցին դեպի Կենտրոնական ընտրական հանձնաժողովի շենքը:  

Ցուցարարները պահանջում են ՀՀ նախագահ Սերժ Սարգսյանի հրաժարականը, ազատ արձակել բանտարկյալներին, պատժել մարտի մեկի դեպքերի մեղավորներին:

2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։-0-