Լեռնային Ղարաբաղի հակամարտության կարգավորման ձևաչափը կտրուկ չի փոխվի, կարծում է քաղաքագետ, Կովկասի ինստիտուտի տնօրեն Ալեքսանդր Իսկանդարյանը։
«Ներկայումս արդեն Լեռնային Ղարաբաղի հակամարտության կարգավորման հաստատված մի ձևաչափ կա՝ ԵԱՀԿ Մինսկի խումբը։ Եվ այդ ձևաչափը հեղափոխական փոփոխությունների ենթակա չէ»,- հինգշաբթի մամուլի ասուլիսում ասաց Իսկանդարյանը։
Մեկնաբանելով ԵԱՀԿ ՄԽ ձևաչափի փոփոխության հնարավորությունը և կարգավորման գործընթացում Ղազախստանի ընդգրկումը՝ փորձագետը նշեց, որ կարգավորման ձևաչափի փոփոխությունը կախված չէ որևէ երկրի կամքից, նույնիսկ այնպիսի ազդեցիկ և հզոր, ինչպիսին է Ղազախստանը, որը Նուրսուլթան Նազարբաևի նման ազդեցիկ առաջնորդ ունի։
Իսկանդարյանն ասաց, որ Նազարբաևը ժամանակին մասնակցել է ղարաբաղյան հակամարտության կարգավորման փորձերին, բայց դա բոլորովին այլ ժամանակաշրջանում է եղել՝ դեռևս Լեռնային Ղարաբաղի պատերազմից առաջ։
Միաժամանակ հայ քաղաքագետն ավելացրեց, որ առաջին անգամ հետխորհրդային երկիրը ԵԱՀԿ նախագահ է դարձել, և վստահություն հայտնեց, որ Ղազախստանն արժանապատվորեն կկատարի իր առաքելությունը։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
