ԱՄՆ-ն չի ճանաչի Հայոց ցեղասպանության փաստը. փորձագետ

ԵՐԵՎԱՆ, 18 փետրվարի. /Նովոստի-Արմենիա/. ԱՄՆ-ն մտադիր չէ ճանաչել Հայոց  ցեղասպանության փաստը Օսմանյան կայսրությունում, կարծում է քաղաքագետ, Կովկասի ինստիտուտի տնօրեն Ալեքսանդր Իսկանդարյանը:

«Չեմ կարծում, որ Հայոց Ցեղասպանության ճանաչման հավանակությունը Միացյալ նահանգների կողմից մեծ է, ինձ այնքան էլ հավանական չի թվում, որ նախագահ Օբաման կարտաբերի «ցեղասպանություն» բառը: Իհարկե, ինչ-որ բան որևէ կերպ նա կասի, բայց Ցեղասպանության ճանաչումը ինձ այնքան էլ հավանական չի թվում»,- ասաց Իսկանդարյանը հինգշաբթի մամուլի ասուլիսի ժամանակ:   

Փորձագետի խոսքերով՝ ԱՄՆ կողմից Հայոց ցեղասպանության ճանաչման հնարավորությունը դիտարկվում է որպես Թուրքիայի վրա ճնշում գործադրելու մեխանիզմ, և եթե Միացյալ նահանգներն օգտագործի այդ մեխանիզմը, ապա ճնշման տարրը կանհետանա, և Թուրքիայի վրա ազդեցություն գործելն ավելի դժվար կլինի:

Ընդ որում Իսկանդարյանը նշեց, որ ամերիկյան կոնգրեսմենները անկախ մարդիկ են և լիովին կարող են որոշում ընդունել Հայոց ցեղասպանության ճանաչման հարցում՝ անկախ վարչակարգի ցանկությունից:
  
Միևնույն ժամանակ քաղաքագետը կարծում է, որ ԱՄՆ-ն հայ-թուրքական գործընթացի «հովանավորն» է և վերջին շրջանում Միացյալ նահանգները փորձում է ճնշում գործադրել Թուրքիայի վրա դրա զարգացման համար:

«Վերջին շրջանում ճնշումն անգամ ուժգնանում է և, համապատասխանաբար, Հայոց ցեղասպանության ճանաչման հարցն անհրաժեշտ է դիտարկել այդ միտումների համատեքստում»,- հավելեց նա:  

Իսկանդարյանի խոսքերով՝ Ամերկայում ակատիվ աշխատում է հայկական լոբբին և Հայոց ցեղասպանության ճանաչման համար մղվող պայքարն ընթանում է մշտապես:

«Իրականում նախագահի կողմից «Ցեղասպանություն» բառի արտաբերումը իրավաբանական ակտ չէ, ԱՄՆ նախագահներից մեկը, ավելի քան 20 տարի առաջ արդեն արտաբերել է «Ցեղասպանություն» բառը: Դա նախագահ Ռեյգանն էր: Բայց ոչինչ էլ տեղի չունեցավ: Նախագահի կողմից այդ բառի հնչեցումը և Հայոց ցեղասպանության ճանաչումը օրենքի մակարդակով երկու տարբեր բաներ են»,- նշեց Իսկանդարյանը: --0--