ԵՐԵՎԱՆ, 18 փետրվարի. /Նովոստի-Արմենիա/. Հայ-թուրքական արձանագրությունների վավերացումը Հայաստանի Ազգային Ժողովում հեշտ չի լինի, կարծում է ՀՅԴ խորհրդարանական խբկացության պատգամավոր Արա Նռանյանը։
Հայաստանի և Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Դաշնակցությունը դեմ է արձանագրությունների վավերացմանը՝ դրանց ներկայիս վիճակով՝ կարծելով, որ դրանք սպառնում են երկրի ազգային անվտանգությանը։
«Ես վստահ չեմ, որ արձանագրությունների վավերացումն արագ ու դյուրին կանցնի»,- հինգշաբթի լրագրողներին հայտնեց Նռանյանը։
Պատգամավորի կարծիքով՝ խորհրդարանական մեծամասնության բազմաթիվ ներկայացուցիչներ այդքան էլ հիացած չեն ներկայացված փաստաթղթերից, իսկ իշխանություններն, «իրավիճակը խճճելով՝ իրենք էլ վերջնականապես խճճվել են, և նրանց հայտարարությունները հակասում են միմյանց»։
Նռանյանը նշեց, որ Դաշնակցությունը կանի հնարավոր ամեն ինչ՝ արձանագրությունների քննարկման գործընթացը հետաքրքիր և արդյունավետ դարձնելու համար։ «Մենք քննարկումներ կունենանք տարբեր գերատսչությունների հետ։ Սպասվում են նաև խորհրդակցություններ շահագրգիռ բոլոր կողմերի հետ»,- ասաց նա։
«Վավերացման դեպքում մենք լուրջ քայլերի կգնանք, որոնց մասին առայժմ չեմ ցանկանում խոսել, քանի որ կարծում եմ, որ դեռևս ամեն ինչ կորած չէ»,- հայտարարեց պատգամավորը։
1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
ՀՀ նախագահ Սեր Սարգսյանը փետրվարի 12-ին «Դիվանագիտական հարաբերություններ հաստատելու մասին արձանագրությունը» և «Երկկողմ հարաբերությունների զարգացման մասին արձանագրությունը» վավերացման է ուղարկել խորհրդարան: --0--
