Թուրքական թերթը կոչ է անում հայերին թշնամիներ չհամարել. թերթ

Թուրքական «Referans» թերթը կոչ է արել հայերին չընկալել որպես թշնամիների, քանի որ դա արդեն վատ սովորություն է դարձել, գրում է «168 ժամ» թերթը:

Ըստ թերթի, թուրքական հրատարակությունը կարծում է, որ ՀՀ Սահմանադրական դատարանի որոշումը կարևոր չէ, քանի որ ոչ թե դատարանները, այլ իշխանություններն են կարգավորում երկրների միջև հարաբերությունները:

Հոդվածի հեղինակը նշել է, որ «Թուրքիայի իշխանություններն ի սկզբանե գիտեին այն ռիսկերի մասին, որ կարող էին առաջ գալ մերձեցման գործընթացի արդյունքում: Չէր կարելի ենթադրել, թե Թուրքիային տարիներով գերի պահող Ադրբեջանը հաշտվելու էր իր ճակատագրի հետ»:

Ինչ վերաբերում է ԱՄՆ-ի դիրքորոշման, ապա հրատարակությունը նշել է, որ ամբողջովին համամիտ է ՀՀ նախագահի խորհրդական Վիգեն Սարգսյանի հետ, ով հայտարարել է, որ հայ-թուրքական արձանագրությունների վավերացման խելամիտ ժամկետը 2010 թ.-ի ապրիլի 24-ն է:

«Ամեն դեպքում, 2010թ.-ի ապրիլի 24-ին լրանում է 1915թ.-ի իրադարձությունների 95-ամյա տարելիցը, և ամեն ինչ կարող է ասվել և արվել», - գրում է թերթն ու նշում, որ եթե Թուրքիան չհամաձայներ կարգավորման գործընթաց սկսել, ապա 2009թ.-ի ապրիլի 24-ին հնչած ԱՄՆ նախագահի ուղերձն ամբողջովին այլ բովանդակություն կունենար: Հեղինակի կարծիքով, եթե նույնիսկ Վաշինգտոնը 1915թ. իրադարձություններին չտա «ցեղասպանություն» որակումը, միևնույն է, թուրք-ամերիկյան հարաբերություններում բարդություններ առաջ կգան հայ-թուրքական արձանագրությունների հարցում առաջընթաց չապահովելու դեպքում: -0-