Հայ-թուրքական հարաբերությունների նորմալացումը կայունացնող գործոն կլինի տարածաշրջանում. ՎԶԵԲ

Հայաստանի և Թուրքիայի միջև հարաբերությունների նորմալացումը լուրջ կայունացնող գործոն կլինի ողջ տարածաշրջանում, ասաց Վերակառուցման և զարգացման եվրոպական բանկի քաղաքական հարցերով խորհրդական Ֆրանկլին Սթիվզը (Franklin Steves)՝ պատասխանելով «Նովոստի-Արմենիա» գործակալության հարցին:  

«Դժվար է պատկերացնել տարածաշրջանի կայուն ապագան առանց հայ-թուրքական հարաբերությունների կարգավորման»,- երեքշաբթի Երևանում զարգացման մասին ՎԶԵԲ հաշվետվությունը (Transition Report) ներկայացնելիս ասաց նա:

1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Բարդ հարաբերությունները պայմանավորված են նրանով, Անկարան  սատարում է ադրբեջանական դիրքորոշմանը ղարաբաղյան հարցում և կտրուկ է արձագանքում Օսմանյան կայսրությունում 1915թ. Հայոց ցեղասպանության միջազգային ճանաչման գործընթացին:

Նշելով, որ ՎԶԵԲ-ը ողջունում է այն գործընթացը, որը տեղի է ունենում անցյալ տարվանից հայ-թուրքական հարաբերությունների համատեքստում, Սթիվզը կարծիք հայտնեց, որ ռուս-վրացական պատերազմից հետո ակնհայտ դարձավ, որ Հայաստանը աշխարհագրական տեսակետից գտնվում է շատ խոցելի վիճակում:

«Նա կտրված է ծովից, իսկ շուկան սնում է միայն երկու ուղի (Վրաստանի և Իրանի տարածքով՝ «Նովոստի-Արմենիա»)»,- պարզաբանեց նա:

Փորձագետը ակնհայտ անվանեց այն, որ կարճաժամկետ փոխազդեցության տեսակետից հայ-թուրքական սահմանի բացումից կարելի է ակնկալել տրանսպորտային ուղիների հետ կապված իրավիճակի արագ բարելավում, մասնավորապես, տրանսպորտային ծախսերի կրճատում և երկրի ներսում գների իջեցում:   

«Մենք լրջորեն ողջունում ենք առկա առաջընթացը և հուսով ենք, որ խորհրդարանները հնարավորինս շուտ կվավերացնեն երկկողմ արձանագրությունները»,- ամփոփեց Սթիվզը:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:—0--