Հայաստանում նշել են Աֆղանստանից խորհրդային զորքի դուրսբերման 21-րդ տարեդարձը

ԵՐԵՎԱՆ, 15 փետրվարի. /Նովոստի-Արմենիա/. Երկուշաբթի Հայաստանի մայրաքաղաքում անցկացվեցին Աֆղանստանից խորհրդային զորքի դուրսբերման 21-րդ տարեդարձին նվիրված միջոցառումներ:

Ինչպես «Նովոստի-Արմենիա» գործակալությանը հայտնեց աֆղանական պատերազմի վետերանների միության նախագահ, ԱԺ պատգամավոր Արմեն Մխիթարյանը, աֆղանական պատերազմի վետերանները, պաշտոնական անձինք, հայկական բանակի բարձրագույն սպայական կազմը մայրաքաղաքի Հաղթանակի զբոսայգում ծաղիկներ են դրել Աֆղանստանի պատերազմի մասնակիցների հուշարձանին:  

«Միջոցառմանը մասնակցել են ՀՀ ԶՈՒ Գլխավոր շտաբի պետ, Աֆղանստանում կռված զինվոր, գեներալ-գնդապետ Յուրի Խաչատուրովը, ինչպես նաև կորպուսների հրամանատարներ, գեներալներ: Ութսուն վետերանի մեդալներ են շնորհել»,- ասաց Մխիթարյանը:

Նա հավելեց, որ հուշարձանին այցելելուց հետո համերգ է տեղի ունեցել և տոնական ընթրիք մատուցվել:

Աֆղանստանում իրենց պարտք են կատարել շուրջ 4000 հայորդիներ, որից 1200-ը արիություն դրսևորելու համար պարգևատրվել են խորհրդային շքանշաններով ու մեդալներով: Աֆղանստանում զոհվել է շուրջ 100 հայ ռազմիկ: -0-