Ոստիկանության մամուլի ծառայությունը հայտնում է, որ կազմակերպված հանցավորության դեմ պայքարի գլխավոր վարչության ծառայողներն օպերատիվ տվյալներն իրացնելիս Երևանի Ծարավ Աղբյուրի փողոցի թիվ 59/1 հասցեում հայտնաբերել են կեղծ կոնյակի արտադրամաս, տեղեկացնում է ՀՀ ոստիկանության մամուլի ծառայությունը:
Հետաքննությամբ պարզվել է, որ 60-ամյա Սամվել Հ.-ն 2005 թվականից հիշյալ հասցեում վարձակալել է տարածք և զբաղվում է կեղծ կոնյակի արտադրությամբ:
Նրա գործընկեր, Մանուկ Ս.-ն, «ՎԱԶ-2107» մակնիշի ավտոմեքենայով հանդերձ, բերման է ենթարկվել ԿՀԴՊ ԳՎ: Ավտոմեքենայի թափքում հայտնաբերվել է 5 շիշ կոնյակ, իսկ վերը նշված արտադրամասում` կեղծ ակցիզային դրոշմանիշերով դրոշմավորված «Նաիրի» տեսակի 108 շիշ կոնյակ, կոնյակի 120 դատարկ շիշ, դրանց համար նախատեսված խցաններ, պիտակներ և 1500 հատ ակցիզային կեղծ դրոշմանիշ: Արտադրամասում հայտնաբերվել է նաև 6 տակառ, որոնց մեջ կար կոնյակի նմանվող հեղուկ:
Բացի այդ, մամուլի ծառայությունից նշեցին, որ Սամվել Հ.-ն իր բնակարանից ներկայացրել է նաև «Նաիրի», «Մակար» և «Ցար Տիգրան» տեսակի 11 շիշ կոնյակ:
Նա հայտարարել է, որ այդ գործունեությամբ զբաղվում է 2005 թվականից և տարբեր քաղաքացիների ու գործող օբյեկտների վաճառել է իր կողմից պատրաստված շուրջ 10.000 լ կեղծ կոնյակ:
«Պարզվել է նաև, որ ակցիզային կեղծ դրոշմանիշերը, ինչպես կեղծ պիտակները, խցանները, հոլոգրաֆիկ նշանները Սամվել Հ.-ն ձեռք է բերել 1960 թ. ծնված Խաչատուր Մ.-ից, որին 2009 թ. դեկտեմբերին տվել է 170.000 դրամ, իսկ իրեն, որպես շահույթ, նույն ժամանակահատվածում մնացել է շուրջ 3.000 ԱՄՆ դոլար»,- ասվում է հաղորդագրության մեջ:
Նախապատրաստված նյութերն ուղարկվել են պետեկամուտների քննչական վարչություն` հետագա ընթացքը լուծելու համար:-0-
