Վերջին 15 տարվա ընթացքում Հայաստանում աճել է քաղցկեղով հիվանդ 1-18 տարեկան երեխաների թիվը, երկուշաբթի լրագրողներին տեղեկացրեց Ուռուցքաբանության ազգային կենտրոնի մանկական ուռուցքաբանության և քիմիական թերապիայի բաժնի պետ Գրիգոր Բադալյանը:
«Ընդհանուր առմամբ վերջին տասնամյակի ընթացքում չարորակ ուռուցքներով հիվանդացությունների մակարդակն աճել է մեծահասակների մոտ 15 տոկոսով, երեխաների մոտ՝ 7-8 տոկոսով, Հայաստանում ևս այդ ցուցանիշների աճ է նկատվում», - ասաց փորձագետը:
Փորձագետի խոսքերով՝ հաշվի առնելով երեխաների ընդհանուր թիվը (1-18 տարեկան), որը վերջին տվյալների համաձայն՝ Հայաստանում կազմում է շուրջ 800 հազար, նկատվում է չարորակ ուռուցքով տառապողների ընդհանուր թվի հարաբերական աճ:
Բադալյանը կարծում է, որ հաշվի առնելով ողջ աշխարհում քաղցկեղային հիվանդություններով հիվանդների ընդհանուր թվի աճը՝ այդ ցուցանիշը չպետք է մտավախություն առաջացնի:
«Եթե մեկ տարվա ընթացքում Հայաստանում գրանցվում է քաղցկեղային հիվանություն (չարորակ ուռուցքներ) ունեցող շուրջ 7 հազար հիվանդ, ապա 80-100 դեպքը մինչև 18 տարեկան երեխաներն են», - ասաց նա:
Միաժամանակ փորձագետը նշեց, որ ընդհանուր առմամբ կենտրոնը՝ համալրված բարձրորակ երիտասարդ կադրերով, ինչպես նաև սարքավորումներով, որոնք թեև փոքր-ինչ զիջում են աշխարհի առաջատար հիվանդանոցներին, այնուամենայնիվ, թույլ են տալիս ախտորոշել ցանկացած տեսակի ուռուցք, մենք բավականին հաջող իրականացնում են քաղցկեղային հիվանդությունների բուժում:
«Այս պահի դրությամբ Կենտրոնը տարածաշրջանում առաջիններից մեկն է, որը զինված է նորագույն սարքավորումներով, ՄԱԳԱՏԷ-ի վերջին մշակումներով, որոնք թույլ են տալիս հաջող կերպով իրականացնել քաղցկեղային հիվանդությունների բուժման ընդունված միջոցներից մեկը՝ ճառագայթումը», - նշեց նա:
Մեկնաբանելով Հայաստանում քաղցկեղի հետևանքով երեխաների մահացության հետ կապված իրավիճակը՝ Բադալյանը նշեց, որ ըստ վիճակագրության՝ եթե քաղցկեղով հիվանդ երեխաների շուրջ 65 տոկոսը բուժվում է, ապա մնացած 35 տոկոսը դիտարկվում են որպես երեխաներ, որոնց չի հաջողվել փրկել:
Փորձագետի խոսքերով՝ քաղցկեղի առավել տարածված տեսակներն են արյան քաղցկեղը (հիվանդների ընդհանուր թվի 25 տոկոսը), երկրորդ և երրորդ տեղում են (17 և 15 տոկոս) գլխուղեղի և ավիշի քաղցկեղը:
Փորձագետը նշել է, որ քաղցկեղով հիվանդացության հիմնական գործոնների թվում են սթրեսն ու էկոլոգիան՝ ընդգծելով, որ քաղցկեղային հիվանդությունների մեծամասնությունը գենետիկորեն չի փոխանցվում:-0-
