ՀՀ նախագահ Սերժ Սարգսյանը Al Jazeera արաբական հեռուստաալիքին տված հարցազրույցի ժամանակ համոզմունք է հայտնել, որ հայ-թուրքական արձանագրությունների վավերացումը ձգձգում է թուրքական կողմը:
«Ոչ միայն մեզ, այլ բոլորի համար էլ տարօրինակ է, թե ինչու են թուրքերը կարծում կամ պնդում, որ հայկական կողմը ձգձգում է վավերացումը: Ընդհակառակը, ակնհայտ է, որ թուրքերն են ձգձգում: Այո, դա միանշանակ է, որովհետև մենք հայտարարել ենք, և վերջին անգամ ես երեկ հայտարարեցի, որ որպես խորհրդարանական մեծամասնություն կազմող քաղաքական ուժի առաջնորդ՝ ես բացառում եմ թուրքերի կողմից այդ արձանագրություններն առանց նախապայմանի վավերացման պարագայում ՀՀ խորհրդարանի կողմից արձանագրությունների չվավերացումը», - ասել է Սարգսյանը Al Jazeera-ին տված հարցազրույցի ժամանակ, որի տեքստը հրապարակվել է ՀՀ նախագահի պաշտոնական կայքում:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից
ՀՀ նախագահ Սերժ Սարգսյանը, հետևելով փետրվարի 10-ին Մեծ Բրիտանիայի միջազգային հարաբերությունների թագավորական ինստիտուտում արված իր հայտարարությանը, հայ-թուրքական արձանագրությունները ներկայացրել է խորհրդարանի վավերացմանը:
Խոսելով այն մասին, թե ինչ կհետևի արձանագրությունների վավերացանը և դրանց ուժի մեջ մտնելուն՝ ՀՀ նախագահը նշել է, որ դրանից հետո պետք է բացվի սահմանը, այնուհետև ստեղծվի միջկառավարական հանձնաժողով, որը կունենա ենթահանձնաժողովներ, և «մենք կսկսենք մեր երկխոսությունը»:
«Այսինքն արձանագրությունները վավերացնելով` մենք ոչ թե գործընթաց ենք ավարտում, այլ գործընթաց ենք սկսում», - պարզաբանել է նա:
Լրագրողի այն հարցին, թե, արդյո՞ք, նա հայ-թուրքական սահմանի բացումը կարևոր է համարում այլ երկրների՝ օրինակ Ռուսաստանի կամ ԱՄՆ-ի համար, ՀՀ նախագահը դրական է պատասխանել:
«Եվ հենց այդ պատճառով և ԱՄՆ-ն, և Ռուսաստանը, և Եվրամիությունը սատարում են այս գործընթացին: Այսինքն՝ խոսքը միայն սահման բացելու մասին չէ: Խոսքը հարաբերություններ հաստատելու մասին է», - ընդգծել է Սարգսյանը:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
