ԵՐԵՎԱՆ, 12 փետրվարի. /Նովոստի-Արմենիա/. ԱՄՆ կառավարությունը կողմ է Հայաստանի և Թուրքիայի միջև հարաբերությունների կարգավորմանը, ասել է Հայաստանում ԱՄՆ արտակարգ և լիազոր դեսպան Մարի Յովանովիչը։
«Վերջին 18 ամսվա ընթացքում, երբ Հայաստանի նախագահը հրավիրեց իր թուրք գործընկերոջը Երևան և սկսեց «ֆուտբոլային դիվանագիտությունը», Հայաստանի և Թուրքիայի իշխանությունները իրար հանդեպ բավական տպավորիչ քայլեր իրականացրեցին»,- ասաց նա ուրբաթ՝ «Հայ-թուրքական հարաբերություններ և միջսահմանային ռեգիոնալիզմ» թեմայով հանրային քննարկումների ընթացքում։
Նշելով, որ վերջին տարվա ընթացքում տեղի ունեցավ երկկողմ արձանագրությունների ստորագրում և նախագահների միջև ուղերձների փոխանակում, Յովանովիչն ասաց, որ ԱՄՆ-ն «հույսեր ունի արձանագրությունների վավերացման վերաբերյալ, և ԱՄՆ կառվարությունը կշարունակի աշխատանքը երկու երկրի ղեկավարության հետ»։
Հայաստանի նախագահ Սերժ Սարգսյանը երեքշաբթի ուղերձ է հղել Թուրքիայի նախագահին՝ անցնելով այդ երկրի օդային տարածքով, Գյուլին և հարևան Թուրքիայի ժողովրդին ողջույններ հղելով։ Ի պատասխան, Թուրքիայի նախագահ Աբդուլա Գյուլը հինգշաբթի պատասխան ուղերձ է հղել իր հայ գործընկեր Սերժ Սարգսյանին, որում նշել է, որ Անկարան կշարունակի ջանքերը Երևանի հետ երկկողմ հարաբերությունների բարելավման ուղղությամբ։
Էդվարդ Նալբանդյանը և Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերություններ հաստատելու մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը պետք է հաստատվեն երկու երկրի խորհրդարաններում:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
