Արվեստի Artexpo 2010 ցուցահանդես կանցկացվի Հայաստանի նկարիչների միությունում
ԵՐԵՎԱՆ, 11 փետրվարի. /Նովոստի-Արմենիա/. Արվեստի Artexpo 2010 ցուցահանդես կբացվի փետրվարի 12-ին Երևանում՝ Հայաստանի նկարիչների միությունում, հինգշաբթի լրագրողներին հայտնեց մշակույթի նախարար Հասմիկ Պողոսյանը։
«Արդեն երկրորդ անգամ մենք տարվա ընթացքում կատարած աշխատանքի յուրօրինակ հաշվետվություն ենք անցկացնում Artexpo ցուցահանդեսի տեսքով։ Ցուցահանդեսի ակնհայտ հաջողությունը մեզ ոգեշնչեց այս տարի ևս անցկացնել նման ցուցահանդես»,- ասաց նա։
Պողոսյանը նշեց մասնավոր հատվածի աննկարագրելի ակտիվությունը ցուցահանդեսի անցկացման գործում։ Ըստ նրա՝ եթե նախորդ տարի ցուցահանդեսին մասնակցել է մոտ 20-30 կազմակերպություն, ապա այս տարի դրանց թիվը գրեթե կրկնապատկվել է։
«Երկու օր՝ փետրվարի 12-ին և 13-ին, Հայաստանի նկարիչների միությունում ավելի քան 50 կազմակերպություն կներկայացնի իր աշխատանքը 53 տաղավարում, ինչպես նաև կներկայացվեն հայկական հուշանվերներ և ամսագրեր»,- ասաց Պողոսյանը։
Նախարարի խոսքերով՝ հայկական ժամանակակից մշակույթի զարգացման վերջին միտումների ներկայացմանը զուգընթաց ցուցահանդեսի հիմնական խնդիրներից կդառնա մշակութային բանավեճերի և գործարար կապերի հարթակի ստեղծումը։ «Այս նպատակով ցուցահանդեսի շրջանակներում կգործի ստեղծագործական սրճարան»,- նշեց Պողոսյանը։
Նախարարի խոսքերով՝ Artexpo-2010-ի նորարարությունը կդառնա պատվավոր հյուրերի մասնակցությունը, ովքեր իրենք կներկայացնեն իրենց ստեղծագործությունները բոլոր այցելուներին և վարպետության դասընացներ կանցկացնեն։ Մասնավորապես, նրա խոսքերով, այս տարի պատվավոր հյուրերի թվում է հայտնի ռուս պրոդյուսեր և սցենարիստ Սաիդա Մեդվեդևան, ով հեռուստադիտողին հայտնի է «Ջուր», «Մահվան գաղտնիքը», «Զգուշացեք, սնունդ է» վավերագրական ֆիլմերով։
Ցուցահանդեսի շրջանակներում կներկայացվի շուրջ 27 ֆիլմ և սլայդ-շոու, տիկնիկային ներկայացում, կկազմակերպվեն հայ բանաստեղծների և գրողների ստեղծագործությունների շնորհանդեսներ, կկայանա հայկական ազգային պարերի ցուցադրություն։
Բացի այդ, այս տարի երեք տաղավարներ կստանան նախարարության կողմից սահմանած մրցանակներ՝ լավագույն ձևավորման համար։ Նախարարի խոսքերով՝ տաղավարները կձևավորեն իրենք մասնակիցները։
Պողոսյանը չբացառեց հետագայում ցուցահանդեսի անցկացումն արտերկրում։
Առաջին անգամ ARTEXPO ցուցահանդեսն անցկացվել է 2009 թվականին։ -0-
