Հայկական եկեղեցին նշում է Սրբոց Վարդանանց տոնը

Հայ Առաքելական Եկեղեցին հինգշաբթի նշում է Սրբոց Վարդանանց տոնը և Ավարայրի հերոսամարտում նահատակված 1036 մարտիրոսների հիշատակի օրը, տեղեկացնում է Արարատյան Հայրապետական Թեմը: Հերոսամարտում հայերը պաշտպանեցին քրիստոնեական հավատը:

Ավարայրի հերոսամարտը տեղի է ունեցել 451 թ.-ի մայիսի 26-ին: Ժամանակագրի խոսքերի համաձայն, «յուրաքանչյուր մարտիկ հոգում եկեղեցի էր և ինքն էլ հոգևորական»: Հայրենիքի, հայ եկեղեցու և քրիստոնեական հավատի պահպանման համար նահատակված Վարդանանց զորավարներն ու 1036 մարտիրոսները Հայաստանյայց Առաքելական Եկեղեցու մեծագույն սրբերից են:

Իրենց նահատակությամբ նրանք հաստատեցին հայ ժողովրդի ապրելու կամքը և լինելիության իրավունքը: «Ավարայրի հերոսամարտը այն բանի վկայությունն է, որ հայերին ոչինչ չի շեղի քրիստոնեական հայրենիքի գաղափարից», - նշել են թեմից:

Հայաստանում քրիստոնեություն ընդունելուց ի վեր Հայ եկեղեցին սերտորեն կապված է եղել հայրենիքի պաշտպանության գործին: Դրա վառ օրինակը Վարդանանց պատերազմն է: Պարսից զորքերի դեմ մղված պատերազմում հայ մարտիկների կողքին էր Հայոց եկեղեցին՝ Հովսեփ կաթողիկոսի և Ղևոնդ Երեցի առաջնորդությամբ: Մարտից առաջ հայ հոգևորականները ոչ միայն քաջալերում էին զորքին, այլև մկրտության և Սբ. Պատարագի խորհրդով առավել ամրապնդում էին նվիրյալների հավատն ու ոգին:

«Եվ սեղան կանգնեցնելով` ամենասուրբ խորհուրդը կատարեցին, պատրաստեցին նաև ավազան, և եթե զորքի բազմության մեջ չմկրտված մարդ կար, ամբողջ գիշերը մկրտեցին: Եվ առավոտյան Սբ. հաղորդություն ընդունեցին», - գրում է Եղիշե պատմիչը Վարդանանց պատերազմից առաջ կատարվածի մասին:

Վարդանանց տոնին Մայր Աթոռ Սբ. Էջմիածնում և հայկական բոլոր եկեղեցիներում մատուցվում է Սբ. Պատարագ:-0-