ՀՀ ՍԴ որոշումը պարտավորեցնում է ՀՀ խորհրդարանին չվավերացնել հայ-թուրքական արձանագրությունները

ԵՐԵՎԱՆ, 10 փետրվարի. /Նովոստի-Արմենիա/. ՀՀ ՍԴ որոշումն այսօրվա տեսքով գրեթե պարտավորեցնում է ՀՀ խորհրդարանին ծայրահեղ զգույշ լինել և չվավերացնել հայ-թուրքական արձանագրությունները, չորեքշաբթի ասաց ՀՅԴ խմբակցության ղեկավար Վահան Հովհաննիսյանը:

«Անգամ եթե որոշակի հանգամանքների բերումով խորհրդարանը արձանագրությունները վավերացնելու մասին որոշում ընդունի, ապա նրանք պետք է վավերացնեն այն վերապահումներով, որոնք ամրագրված են ՍԴ որոշման մեջ»,- հայտարարեց նա:

Միևնույն ժամանակ Հովհաննիսյանը նշեց, որ առայժմ դժվար է ասել ՀՅԴ կաջակցի, թե դեմ հանդես կգա խորհրդարանի որոշմանը, այս մասին հնարավոր կլինի ասել միայն այն բանից հետո, երբ որոշումն ընդունվի:

Խոսելով այն մասին, թե գործընթացի կողմերից որն առաջին քայլը կանի, Հովհաննիսյանը դժվարացավ պատասխանել:  

«Մեր իշխանությունների դիրքորոշումն այն բանի մասին, թե արձանագրությունները կվավերացվեն արդյոք ՀՀ խորհրդարանի կողմից թուրքական խորհրդարանի՝ դրանք վավերացնելուց հետո միայն, մի կողմից վատ դիրքորոշում չէ, սակայն, մյուս կողմից այն մեզ կաշկանդում է»,- ասաց Հովհաննիսյանը:

Քաղաքագետի կարծիքով, հայկական կողմի համար ամենակարևոր փաստաթղթի՝ ՍԴ որոշման առկայության դեպքում այսուհետ հայկական իշխանությունների դիրքորոշումը խորհրդարանի կողմից արձանագրությունների վավերացումը կամ չվավերացումը թուրքական կողմի գործողությունների հետ կապելու առնչությամբ այնքան էլ ճիշտ չէ: 

Խոսելով արձանագրությունների վավերացման ժամկետների մասին՝ Հովհաննիսյանը նշեց, որ սատարում է ՀՅԴ բյուրոյի ներկայացուցիչ Հրանտ Մարգարյանի դիրքորոշումը, համաձայն որի, եթե արձանագրությունները չվավերացվեն մինչև մարտ ամիս, ապա կարելի է խոսել Թուրքիայի մեղքով գործընթացի միակողմանի ձախողման մասին:

Հովհաննիսյանի խոսքերով, նման հայտարարությունը հիմնված է նախագահի, ագ նախարարի և ՀՀ այլ բարձրաստիճան պաշտոնյաների բազմաթիվ հայտարարությունների վրա, որոնք խոսում էին վավերացման խելամիտ ժամկետների մասին:

«Եթե մինչև մարդ Թուրքիան այս հարցը չվերանայի, ապա հասկանալի է ձգձգման պատճառը: Սա արվում է նրա համար, որ ապրիլի 24-ն անցնի: Եթե Թուրքիան այդպես է վերաբերվում այս հարցին, ապա նշանակում է, որ ձգձգում է գործընթացը, և այլևս ինչ հարաբերությունների հաստատման մասին խոսք կարող է գնալ»,- հայտարարեց Հովհաննիսյանը:   

Հայաստանի Սահմանադրական դատարանը հունվարի 12-ին արձանագրություններում ամրագրված պարտավորությունները Հայաստանի սահմանադրությանը համապատասխանող է ճանաչել: Ընդունելով, որ կողմերի սահմանած պարտավորությունները փոխադարձ միջպետական բնույթ են կրում և չեն կարող երրորդ երկրի վրա, ՍԴ-ն միաժամանակ փաստել է նաև, որ արձանագրությունների առաջնահերթային դրույթն է հանդիսանում հայ-թուրքական սահմանի փաստացի բացումը, և մյուս բոլոր պարտավորություններն իրավական ուժ են ստանում միայն հայ-թուրքական սահմանի բացման առկայությունից հետո:

Էդվարդ Նալբանդյանը և Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին  «Դիվանագիտական հարաբերություններ հաստատելու մասին արձանագրությունը» և «Երկկողմ հարաբերությունների զարգացման մասին արձանագրությունը»:-0-