Հայ-թուրքական սահմանի բացումը ԱՄՆ-ից է կախված. ընդդիմադիր պատգամավոր

Հայ-թուրքական սահմանի բացումը կախված է ԱՄՆ-ից, կարծում է «Ժառանգություն» ընդդիմադիր խորհրդարանական խմբակցության ղեկավար Ստեփան Սաֆարյանը։

«Այսօր հայ-թուրքական սահմանի բացումը կախված է ԱՄՆ-ից, որի համար սահմանի բացումը լուրջ աշխարհաքաղաքական նշանակություն ունի, քանի որ կթուլացնի Իրանի ու Ռուսաստանի դիրքերը տարածաշրջանում»,- երեքշաբթի մամուլի ասուլիսի ժամանակ ասաց Սաֆարյանը։     

Ըստ նրա, ԱՄՆ-ից շատ բան է կախված հայ-թուրքական հարաբերությունների նորմալացման գործընթացում։

Ընդ որում, ընդդիմադիր խորհրդարանական խմբակցության ղեկավարը կարծում է, որ ԱՄՆ-ի կողմից Հայոց Ցեղասպանության ճանաչումը Թուրքիայի համար սթափեցնող գործոն կդառնա և կխթանի հայ-թուրքական հարաբերությունների զարգացումը։  

«Որքան ավելի արագ Ամերիկան հասկանա դա, այնքան լավ»,- ասաց Սաֆարյանը։ Ըստ նրա, ԱՄՆ ներկայում խուսափում է հայոց Ցեղասպանության ճանաչումից Թուրքիային նեղացնել չցանկանալու պատճառով։

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:

Հայաստանի և Թուրքիայի հարաբերությունները բավականին լարված էին մինչև այն ժամանակ, երբ երկու երկրի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Հայոց մեծ եղեռնը 20-րդ դարի առաջին ցեղասպանությունն է, որը կազմակերպվել և ծրագրավորված իրագործվել է երիտթուրքական կառավարության կողմից, ինչի հետևանքով Օսմանյան կայսրության կազմի մեջ մտնող Արևմտյան Հայաստանում, սրի է քաշվել ավելի քան 1,5 մլն հայ։-0-