Հայաստանի ֆուտբոլի հավաքականն իր առջև առավելագույն նպատակներն է դնում Եվրոպայի 2012թ.-ի առաջնության ընտրական խմբում, «Նովոստի-Արմենիա» գործակալությանը հայտնեց Հայաստանի հավաքականի գլխավոր մարզիչ Վարդան Մինասյանը:
«Այժմ թույլ թիմեր Եվրոպայում չկան, և անկախ վիճակահանության արդյունքներից՝ մենք պետք է միշտ մեր առջև առավելագույն նպատակներ դնենք և լուծենք: Բնական է՝ մեր ցանկությունն ու խնդիրը եզրափակիչ դուրս գալու հարցը լուծելն է», - նշեց Մինասյանը:
Խոսելով խմբի մրցակիցների մասին՝ Մինասյանը նշեց, որ Սլովակիան ՀԱՀ-ում կայանալիք աշխարհի առաջնության մասնակիցն է, ուր անցել է՝ իր խմբում զբաղեցնելով առաջին տեղը: Ֆրանսիայի հետ տեղի ունեցած հանդիպման ժամանակ հայտնի դեպքերի հետևանքով (աշխարհի 2010 թ.-ի առաջնություն դուրս գալու ճակատագիրը որոշեց ֆրանսիացի Թիերի Անրիի ձեռքով խփած գնդակը) Իռլանդիային մի փոքր չբավականացրեց աշխարհի առաջնություն դուրս գալու համար:
«Եվ բնականաբար խոսք չկա Ռուսաստանի ուժի մասին, նա վառ արտահայտված առաջատարն է», - ընդգծեց ՀՀ ֆուտբոլի հավաքականի գլխավոր մարզիչը:
Ինչ վերաբերում է Մակեդոնիայի և Անդորրայի հավաքականներին, ապա Մինասյանի խոսքերով, մակեդոնացիները հարուստ ֆուտբոլային ավանդույթներ ունեն, իսկ Անդորրան ի վիճակի է անակնկալ մատուցելու:
Հայաստանի հավաքականը հայտնվել է Եվրոպայի 2012 թ.-ի առաջնության ընտրական B խմբում: Հայկական թիմի մրցակիցներն են Ռուսաստանի, Սլովակիայի, Իռլանդիայի, Մակեդոնիայի և Անդորրայի հավաքականները:-0-
