ՀՀ մշակույթի նախարարությունը ՀՀ մշակույթի նախկին խորհրդական, իրավաբանական և վերահսկողության վարչության պետ Արեգ Հայրապետյանի դեմ հարուցված քրեական գործի օբյեկտիվ քննությանը աջակցելու պատրաստակամություն է հայտնում: Արեգ Հայրապետությանը մեղադրվում է խաբեությամբ առանձնապես խոշոր չափերի գումար հափշտակելու մեջ:
«ՀՀ մշակույթի նախարարությունը պատրաստակամ է ամենայնս աջակցել գործի բազմակողմ ու օբյեկտիվ քննությանը և նախաքննության մարմնին տրամադրել բոլոր անհրաժեշտ փաստաթղթերն ու նյութերը», - երկուշաբթի հաղորդում է նախարարության մամուլի ծառայությունը:
ՀՀ գլխավոր դատախազության պետական շահերի պաշտպանության վարչությունում հունվարի 29-ին հարուցվել է քրեական գործ՝ ՀՀ մշակույթի նախարարի նախկին խորհրդականի կողմից պաշտոնեական դիրքը չարաշահելու վերջինիս օժանդակությամբ նույն նախարարության աշխատակազմի իրավաբանական և վերահսկողության վարչության պետ Արեգ Հայրապետյանի կողմից պաշտոնական դիրքը չարաշահելու միջոցով խաբեությամբ առանձնապես խոշոր չափերի գումար հափշտակելու դեպքի առթիվ:
ՀՀ գլխավոր դատախազության տվյալների համաձայն, Հայրապետյանը, ով վերահսկել է ավելի քան 19 միլիոն դրամի (50 հազար դոլարից ավել) պետական գնումների գործընթացը, չարաշահել է իր պաշտոնեական դիրքը՝ ստորագրել է նախարարության և «Ինօրիենթ» ՍՊ ընկերության միջև կնքված պայմանագրի համաձայն՝ փաստացի չկատարված աշխատանքների տեխնիկական բնութագրերի եզրակացությունները՝ նման կերպով յուրացնելով այդ միջոցները:
ՀՀ մշակույթի նախարարության կողմից տարածած հայտարարության մեջ նշվում է, 2007թ.-ին ՀՀ մշակույթի նախարարությունը, ունենալով մշակույթի ոլորտում քաղաքականություն իրականացնելու երկարատև ռազմավարական ծրագրի, ինչպես նաև մշակույթի ոլորտի որոշ իրավական ակտերում փոփոխություններ կատարելու նախագծերի անհրաժեշտություն, սահմանված կարգով դիմել է «Պետական գնումների գործակալությանը»` մրցույթ կազմակերպելու համար, սակայն հայտարարված մրցույթին մասնակցելու որևէ հայտ չի ներկայացվել և մրցույթը հայտարարվել է չկայացած:
«Այնուհետև` օրենքով սահմանված կարգով, կնքվել է մեկ անձից աշխատանքների գնման պայմանագիր: Պայմանագրի կատարման արդյունքում ՀՀ մշակույթի նախարարությունն ընդունել է պայմանագրի առարկա հանդիսացող փաստաթղթերը` «Հայաստանի Հանրապետության մշակույթի զարգացման 2008-2013 թթ. Ռազմավարության» և այլ իրավական ակտերի նախագծերը: Դրանք առկա են նախարարությունում, և մինչ օրս այդ փաստաթղթերի հիման վրա ձևավորվում ու իրականացվում են մշակույթի տարբեր ոլորտներում կարճաժամկետ և երկարաժամկետ ծրագրերը», - ասվում է տեղեկատվության մեջ:-0-
