ԵՐԵՎԱՆ, 8 փետրվարի. /Նովոստի-Արմենիա/. Վաշինգտոնին ոգևորել է հայ-ամերիկյան կապերի ամրապնդումը, Հայաստանի Հանրային Հեռուստատեսությանը տված հարցազրույցում ասել է ԱՄՆ պետքարտուղարի առաջին տեղակալ Ջեյմս Սթայնբերգը:
Դիվանագետը նշել է, որ նախորդ շաբաթ Երևան կատարած այցելության ընթացքում նա ՀՀ նախագահ Սերժ Սարգսյանի հետ քննարկել է տարբեր ոլորտներում, այդ թվում նաև՝ ապրանքաշրջանառության, մշակութային փոխանակումների ոլորտներում, անվտանգության ոլորտում փոխգործակցության բնագավառում հայ-ամերիկյան կապերի ընդլայնմանն առնչվող հարցերը:
Նա նաև նշել է, որ Վաշինգտոնում կարևորում են ԱՄՆ հայկական համայնքի հետ պարբերական շփումները: Սթայնբերգի խոսքերով, նախագահ Օբամայի վարչակազմի գործելու ընթացքում հայկական համայնքի հետ բազմաթիվ հանդիպումներ են անցկացվել:
«Կարծում եմ՝ շատ կարևոր է կապ պահպանել այն ամերիկացիների հետ, ովքեր հետաքրքրվում են իրենց հայրենի երկրով և ԱՄՆ-ի կարևոր համայնքն են: Նրանք օգնում են մեզ ավելի լավ հասկանալ իրավիճակը, հետևաբար մենք գնահատում ենք այդ կապը, որպեսզի նրանց բացատրենք, թե ինչ ենք փորձում անել և հասկանալ նրանց մտահոգություններն ու մոտեցումները», - նշել է Սթայնբերգը:
Խոսելով տարածաշրջանի մասին՝ Սթայնբերգը նշել է, որ ԱՄՆ-ն այստեղ երկարաժամկետ շահեր ունի:
Մասնավորապես դիվանագետի խոսքերով՝ բացի Հայաստանի հետ փոխգործակցությունից, Վաշինգտոնն ամուր կապեր է պահպանում նաև Վրաստանի հետ և շարունակում է աջակցել Վրաստանի կառավարությանը:
«Մենք նաև կապեր ունենք Ադրբեջանի և Թուրքիայի հետ: Մենք տարածաշրջանում ունենք մեծ շահեր, լավ գործընկերներ և ցանկանում ենք օգնել նրանց գոյություն ունեցող տարաձայնությունների լուծման հարցում», - ասել է Սթայնբերգը:-0-
