ՀՀ մշակույթի նախարարի նախկին խորհրդականը մեղադրվում է հատուկ խոշոր չափերի խարդախության մեջ. գլխավոր դատախազություն

ՀՀ  գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ մշակույթի նախարարի խորհրդականի կողմից պաշտոնեական դիրքը չարաշահելու և վերջինիս օժանդակությամբ նույն նախարարության աշխատակազմի իրավաբանական և վերահսկողության վարչության  պետի կողմից պաշտոնեական դիրքը չարաշահելու միջոցով խաբեությամբ առանձնապես խոշոր չափերի գումար հափշտակելու դեպքի առթիվ, հայտնում է Գլխավոր դատախազության մամուլի ծառայությունը:

««Ինօրիենթ»  ՍՊ ընկերության վերաբերյալ ՀՀ վերահսկիչ պալատից ստացված նյութերի ստուգմամբ պարզվել է, որ  ՀՀ մշակույթի և երիտասարդության նախարարի նախկին խորհրդական, նույն նախարարության աշխատակազմի իրավաբանական և վերահսկողության վարչության ներկայիս պետ Ա. Հայրապետյանը վերահսկել է ավելի քան  19 մլն դրամ գումարի գնումների գործընթացը»,- ասվում է հաղորդագրության մեջ:

ՀՀ Գլխավոր դատախազության տվյալներով՝ պաշտոնեական դիրքը ծառայության շահերին հակառակ օգտագործելով՝ նա  կազմակերպել է նախարարության և «Ինօրիենթ» ՍՊ ընկերության միջև իրավական ակտերի մշակման ծառայությունների գնման պայմանագրի կնքումը, որով նախատեսված 19.010.000 դրամ առանձնապես խոշոր չափերի գումարը խաբեությամբ հափշտակելու դիտավորությամբ: Արդյունքում Հայրապետյանը հափշտակում է  19.010.000 դրամ առանձնապես խոշոր չափերի գումար` պետությանը պատճառելով էական նյութական վնաս, ինչն անզգուշությամբ առաջացրել է ծանր հետևանքներ:

«Դեպքի առթիվ ՀՀ գլխավոր դատախազության պետական շահերի պաշտպանության վարչության դատախազը 29.01.10թ. հարուցել է քրեական գործ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետի, 38-178-րդ հոդվածի 3-րդ մասի 1-ին կետի և 308-րդ հոդվածի 2-րդ մասի հատկանիշներով»,- ասվում է հաղորդագրության մեջ: 

Քրեական գործն ուղարկվել է ՀՀ ոստիկանության քննչական գլխավոր վարչություն՝ նախաքննություն իրականացնելու:-0-