Վարչապետ Տիգրան Սարգսյանն ուրբաթ Երևանում գիտության ոլորտի համագործակցության հարցեր է քննարկել Ռուսաստանի Դաշնության վարչապետի առաջին տեղակալ Իգոր Շուվալովի հետ, հայտնում է հայկական կառավարության մամուլի ծառայությունը:
Ողջունելով հյուրերին` վարչապետը կարևորել է Շուվալովի այցը Հայաստան երկու երկրների միջև հարաբերությունների ամրապնդման համատեքստում և վստահություն է հայտնել, որ այցը նոր թափ կհաղորդի երկու երկրների համագործակցությանը:
Վարչապետը գոհունակություն է հայտնել երկկողմ և բազմակողմ ձևաչափի հարաբերությունների մակարդակից:
Իր հերթին Իգոր Շուվալովը, շնորհակալություն հայտնելով ընդունելության համար, նշել է, որ կարևորում է փոխգործակցության հարցերը երկկողմ հարաբերություններում և ԱՊՀ շրջանակներում` ընդգծելով համագործակցությունը գիտության ու նորարարության բնագավառներում:
Կողմերը կարևորվել են Հայրենական մեծ պատերազմում հաղթանակի 65-րդ տարեդարձին նվիրված արարողությունները, ինչպես նաև երկկողմ հետաքրքրություն ներկայացնող այլ հարցեր:
Հաշվի առնելով հանգամանքը, որ 2010 թվականը ԱՊՀ-ում հայտարարվել է գիտության և նորարարությունների տարի, զրուցակիցներն անդրադարձել են նաև համատեղ միջոցառումների իրականացման հարցին:
Մասնավորապես, նշվել է, որ արդեն անցկացվում են համատեղ հետազոտություններ կենսաքիմիայի, նեյրոքիմիայի, մոլեկուլյար կենսաբանության, բժշկական գենետիկայի, քիմիական ֆիզիկայի և այլ ոլորտներում:
Քննարկվել են նաև Հայաստանում միջուկային բժշկության զարգացման և հայ-ռուսական նորարական կենտրոնի բացման հեռանկարները:
Տիգրան Սարգսյանն ընդգծել է, որ բարձր տեխնոլոգիաների զարգացումը Հայաստանի տնտեսության առաջնահերթություններից է, և ձևավորված ավանդույթների առկայությունը փոխշահավետ համագործակցության խորացման մեծ հնարավորություն է ընձեռում:
Վարչապետը շեշտել է նաև, որ չնայած տնտեսական ճգնաժամին` Հայաստանը կատարել է ԱՊՀ շրջանակներում իր ստանձնած բոլոր պարտավորությունները, ընդ որում` ֆինանսական ներդրումները կատարվել են նախատեսված ժամկետից շուտ:
Միջոցներ են ձեռնարկվում ԱՊՀ Տնտեսական զարգացման ռազմավարության առաջին փուլի իրագործման համար:
Զրուցակիցներն անդրադարձել են նաև Հայաստանում ռուսական ընկերությունների գործունեության խնդիրներին, էներգետիկայի, տրանսպորտի ու այլ ոլորտներում համագործակցության ընթացքին:
Շուվալովը Հայաստան է ժամանել հինգշաբթի՝ որպես ԱՊՀ գործերով ՌԴ ազգային համակարգող՝ կապված ԱՊՀ-ում ռուսական նախագահության մեկնարկի հետ:
Այցի ընթացքում ծրագրված են նաև նրա հանդիպումները ՀՀ նախագահ Սերժ Սարգսյանի և փոխնախագահ, ՀՀ տարածքային կառավարման նախարար Արմեն Գևորգյանի հետ: -0-
