ՀՀ նախագահը հայ-ամերիկյան հարաբերությունների խորացման հույս ունի
ՀՀ նախագահ Սերժ Սարգսյանը հինգշաբթի ԱՄՆ պետքարտուղարի առաջին տեղակալ Ջեյմս Սթայնբերգի հետ հանդիպման ժամանակ հույս է հայտնել, որ հայ-ամերիկյան հարաբերությունները կխորանան:
«Հայ-ամերիկյան հարաբերություններն ավանդաբար կրում են ջերմ, բարեկամական բնույթ, և այսօրինակ այցելությունները շատ կաևոր են մեր երկրների միջև երկխոսությունը շարունակելու տեսակետից», - մեջբերեցին նախագահի խոսքերը ՀՀ նախագահի մամուլի ծառայությունից:
Նշելով, որ նախորդ հանդիպումից (2009 թվականի հուլիս) բավական ժամանակ է անցել` Սերժ Սարգսյանը շեշտել է, որ այդ ընթացքում կարևոր իրադարձություններ են տեղի ունեցել, ևայս հանդիպումը շատ լավ առիթ է որոշ արդյունքներ իմի բերելու և առաջ շարժվելու համար:
ՀՀ նախագահի խոսքերով, որոշակի առաջընթաց է արձանագրվել տնտեսության ոլորտում: «Այս ընթացքում ԱՄՆ-ն դարձել է մեր առևտրային հինգերորդ գործընկերը և երրորդը` արտահանման գծով, ինչը մեզ համար չափազանց կարևոր է: Մենք որոշակի օրենսդրական փոփոխություններ ենք կատարել, ինչը ևս պետք է նպաստի երկկողմ հարաբերությունների խորացմանը», - ընդգծել է նախագահ Սարգսյանը:
ԱՄՆ վարչակազմի բարձրաստիճան պաշտոնյան նշել է, որ փոխպետքարտուղար դառնալուց ի վեր սա իր երկրորդ այցն է Հայաստան: Ջեյմս Սթայնբերգը Հանրապետության նախագահին փոխանցել է ԱՄՆ պետքարտուղար Հիլլարի Քլինթոնի ջերմ ողջույնները և վերահաստատել է ամերիկյան կողմի «պատրաստակամությունն ու ցանկությունը` շարունակելու աշխատել և երկկողմ, և բազմակողմ հարցերի, այդ թվում նաև` տարածաշրջանային խնդիրների շուրջ:
Հանրապետության նախագահը և ամերիկյան վարչակազմի բարձրաստիճան պաշտոնյան դրական են գնահատել հայ-ամերիկյան հարաբերությունների ներկա վիճակը թե ծավալի, և թե արդյունավետության առումով` նշելով, որ երկկողմ համագործակցությունը դինամիկ զարգանում է անվտանգության, կրթության, մշակույթի և այլ ոլորտներում:
Զրուցակիցները նաև համակարծիք են եղել, որ պետք է լուրջ աշխատել առևտրատնտեսական կապերի ընդլայնման ուղղությամբ:
Սթայնբերգին Երևան այցելության ընթացքում ուղեկցում են ԱՄՆ պետքարտուղարի տեղակալ Ֆիլիպ Գորդոնը, Հայաստանում Միացյալ Նահանգների դեսպան Մարի Յովանովիչը, պաշտոնատար այլ անձինք:-0-
