Թուրքիան պատրաստ է իր վրա վերցնել Հայաստանի հետ հարաբերությունների բարելավման նախաձեռնությունը, հինգշաբթի «Նովոստի-Արմենիա» գործակալությանը հայտնեց թուրք փորձագետ, էներգետիկայի, քաղաքականության և շուկաների ուսումնասիրման ռեսուրսային կենտրոնի տնօրեն Ֆելիս Կատմանը։
«Թուրքիան բավականաչափ քաղաքական կամք ունի իր հարևանների հետ հարաբերությունների բարելավման նպատակով, ներառյալ Հայաստանը, և պատրաստ է իր վրա վերցնել նախաձեռնությունը տվյալ հարցում»,- ասաց Կատմանը։
Ըստ նրա` թուրքական իշխանությունները դրական են տրամադևված և պատրաստ են հետևողականորեն լուծել ամենաբարդ հարցերը, եթե մյուս կողմը նույն պատրաստակամություն արտահայտի։
«Հայ-թուրքական արձանագրությունների ստորագրումը ցույց է տալիս, որ Հայաստանը բավարար քաղաքական կամք ունի հարաբերությունների բարելավման համար»,- ավելացրեց Կատմանը։
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ --0--
