ԵՐԵՎԱՆ, 3 փետրվարի. /Նովոստի-Արմենիա/. Մինսկի խմբի համանախագահ-երկրները հասկանում են Ղարաբաղյան հակամարտության կարգավորման գործընթացում Լեռնային Ղարաբաղի՝ բանակցային գործընթացին մասնակցելու անհրաժեշտությունը, ՀՀ խորհրդարանում կառավարական ժամի ընթացքում հայտարարեց ՀՀ ԱԳ նախարար Էդվարդ Նալբանդյանը:
«Մենք բազմիցս հայտարարել ենք, որ առանց Լեռնային Ղարաբաղի մասնակցության հնարավոր չէ կարգավորել Ղարաբաղյան հակամարտությունը: Կարող եմ ասել, որ մեր մոտեցումը ԼՂՀ մասնակցության առնչությամբ ըմբռնում է գտնում երեք համանախագահների շրջանում»,- ասաց նախարարը:
Նա հավելեց նաև, որ Ադրբեջանի հայտարարությունները բանակցային գործընթացում Լեռնային Ղարաբաղի մասնակցության անհնարին լինելու մասին ևս մեկ անգամ հաստատում են նրա ոչ կառուցողական մոտեցումը Ղարաբաղյան հակամարտության կարգավորման խնդրին:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
