ԵՐԵՎԱՆ, 3 փետրվարի. /Նովոստի-Արմենիա/. ԱՄՆ Պետդեպարտամենտի ղեկավարը կոչ է անում Հայաստանին ու Թուրքիային վավերացնել անցյալ տարի Ցյուրիխում կնքված հայ-թուրքական արձանագրությունները, երեքշաբթի հայտնում է Worldbulettin.com-ը:
Հաղորդագրության համաձայն, ԱՄՆ պետքարտուղարի օգնական Ֆիլիպ Գորդոնը նշել է, որ կողմերը պետք է առաջ շարժվեն հայ-թուրքական արձանագրությունների վավերացման գործընթացում:
«Գորդոնը կոչ է արել Թուրքիային ու Հայաստանին ավելի արագ առաջ շարժվել արձանագրությունների վավերացման ու կատարման գործընթացում»,- հայտնում է աղբյուրը:
«Սա երկու պետությունների միջև առկա պատմական տարբերությունները հաղթահարելու հնարավորություն է երկու կողմերի համար էլ փոխշահավետ մեթոդով»,- նշել է Գորդոնը, գրում է Worldbulettin.com:
Գորդոնի խոսքերով, երկրների միջև հարաբերությունների նորմալացումն ու սահմանների բացումը կնպաստի տարածաշրջանի կայունացմանը:
Միևնույն ժամանակ, ինչպես հայտնում է աղբյուրը, Գորդոնը նշել է, որ գործընթացը պետք է առաջ գնա առանց այլ հարցերի հետ կապակցման, պարզապես այն պատճառով, որ դա բխում է երկու երկրների շահերից:
Հաղորդագրության համաձայն, Գորդոնը դրական է գնահատել հայ-թուրքական հարաբերությունների նորմալացման գործընթացն ու նշել այդ ուղղությամբ առաջ շարժվելու անհրաժեշտությունը:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
