Ամուսնությունների և ամուսնալուծությունների իրական թիվը չի համապատասխանում պաշտոնական տվյալներին. սոցիոլոգ

Հայաստանում ամուսնությունների և ամուսնալուծությունների պաշտոնական ու իրական ցուցանիշները չեն համընկնում, չորեքշաբթի մամուլի ասուլիսի ժամանակ ասաց սոցիոլոգ, ՀՀ Ազգային վիճակագրական ծառայության գիտահասարակական խորհրդի անդամ Ահարոն Ադիբեկյանը:

ԱՎԾ տվյալների համաձայն, 2009թ.-ին Հայաստանում գրանցվել է  18773 ամուսնություն, ինչը 1,7 տոկոսով շատ է 2008թ.-ի ցուցանիշից, ինչպես նաև 2929 ամուսնալուծություն, ինչը 6 տոկոսով քիչ է, քան 2008թ.-ին:

Ադիբեկյանը պարզաբանեց, որ ամուսնությունների և ամուսնալուծությունների սոցիոլոգիայում կա գաղտնի ամուսնություններ և ամուսնալուծություններ հասկացություն:

Այս առնչությամբ նա ասաց, որ, իր տվյալներով, 40-ն անց ամուսնական զույգերի ¾-ը դադարում են ապրել սեռական կյանքով և, փաստորեն, դառնում կեղծ ամուսիններ:

«Սակայն վիճակագրական ծառայությունն այս մասին չգիտի, և շարունակում է նման զույգերին ամուսիններ համարել»,- պարզաբանեց նա:  

Բացի այդ, ըստ նրա, անցյալ տարի Հայաստանում ծնվել է 44465 երեխա, ընդ որում շուրջ 4 հազար երեխայի ծննդյան մասին որպես հիմք ընդունվել է միայնակ մոր դիմումը:

Ադիբեկյանն այս առնչությամբ նշեց, որ սոցիոլոգիական տեսակետից նման վերաբերմունքը, երբ երեխայի հայրը, չլինելով նրա մոր ամուսինը, հայրություն է ճանաչում, նույնպես ամուսնություն է համարվում: 

Խոսելով բնակչության շրջանում ամուսնալուծությունների քանակի մասին՝ նա ասաց, որ պաշտոնական տվյալներով, Երևանում 4 ամուսնությանը բաժին է ընկնում մեկ ամուսնալուծություն, իսկ գյուղական վայրերում՝ 10 ամուսնությանը՝ 1 ամուսնալուծություն:

«Գյուղական ընտանիքներն ավելի կայուն են, քանի որ քաղաքը բաժանվելու և առանձին ապրելու ավելի շատ հնարավորություններ է տալիս, քան գյուղը»,- պարզաբանեց նա:  

Վիճակագրական տվյալներով 2009թ.-ին 1000 ամուսնությանը բաժին ընկնող ամուսնալուծությունների թվի ցուցանիշով առաջատարի դիրքում է Լոռու մարզը (330), ինչպես նաև Երևանը (183), ինչը սակայն փոքր-ինչ պակաս է անցյալ տարվա ցուցանիշից:   

Ադիբեկյանը հայտնեց նաև, որ վերջերս տարածաշրջանի երկրներում անցկացրած հետազոտության տվյալներով պարզ է դառնում, որ ամուսնացող երիտասարդ կանայք, ինչպես քաղաքներում, այնպես էլ գյուղերում, երկու երեխայից ավել չեն ծրագրում ունենալ, այն դեպքում, երբ նախկինում քաղաքներում այդ ցուցանիշը 2-3 երեխա էր կազմում, իսկ գյուղերում՝ 3-4:

«Մեկ երեխայի դեպքում ամուսնալուծության ռիսկն ընտանիքում հասնում է 70 տոկոսի, այդ իսկ պատճառով եթե կանայք ուզում են, որ իրենց ամուսինները անընդհատ իրենց կողքին լինեն, ապա պետք է 4 երեխա ունենան»,- ամփոփեց նա: -0-