Ադրբեջանը կարող է պատերազմ սկսել հայ-թուրքական հարաբերությունների կարգավորման գործընթացին հակազդելու համար. Դաշնակցություն

Ադրբեջանը կարող է պատերազմ սկսել հայ-թուրքական հարաբերությունների կարգավորման գործընթացում առաջընթացի դեպքում, կարծում է «Հայ դատի» կենտրոնական գրասենյակի տնօրեն և ՀՅԴ քաղաքական հարցերի պատասխանատու Կիրո Մանոյանը։

«Կարծում եմ՝ Ադրբեջանը կարող է պատերազմ սկսել միայն երկու դեպքում՝ եթե համոզված լինի իր հաղթանակի մեջ գոնե 51 տոկոսով, եթե մտահոգվի այն փաստով, որ Թուրքիան լքել է իրեն և կարգավորում է հարաբերությունները Հայաստանի հետ առանց ղարաբաղյան հակամարտության կարգավորման», - հայտարարեց նա:

Մանոյանի խոսքերով՝ գերտերությունները կհակազդեն նոր պատերազմի սպառնալիքին տարածաշրջանում իրենց նավթային շահերի պատճառով, ու նաև նշեց, որ «նավթն ու գազը խաղաղություն են սիրում», սակայն չբացառեց, որ Ադրբեջանը, չնայած դրան, կարող է, ամեն դեպքում, սկսել նոր պատերազմ:

Նա նաև նշեց, որ Թուրքիան ևս նոր պատերազմ չի ցանկանում, քանի որ դա կարող է հանգեցնել անկանխատեսելի հետևանքների՝ ընդհուպ մինչև պատերազմի մեջ Թուրքիայի և այլ պետությունների ներգրավումը:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

 Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-