Երևանը հերքել է Հայաստանի կողմից Քուր և Արաքս գետերի աղտոտման մասին Բաքվի հաղորդագրությունները

Օրերս ադրբեջանական մամուլը տեղեկություն էր տարածել այն մասին, թե իբր դեկտեմբեր և հունվար ամիսներին անցկացված մոնիտորինգի արդյունքում պարզվել է, որ Քուր և Արաքս գետերում ջրի աղտոտվածությունը մեծ է հատկապես պղնձի միացություններով և ֆենոլով:  Որպես աղտոտման հեղինակ ադրբեջանական կողմը տեսնում է, մասնավորապես, նաև Հայաստանին:

«Ադրբեջանական կողմի տվյալները չեն համապատասխանում իրականությանը:

2009թ.-ի մոնիթորինգային տվյալների միջին տարեկան արժեքների համեմատությունից պարզվել է, որ պղնձի կոնցենտրացիաների արժեքները հայկական սահմանամերձ գետերում գտնվել են կոմունալ-կենցաղային օգտագործման ջրերի սահմանային թույլատրելի նորմաների սահմաններում: Ֆենոլների կոնցենտրացիայի հայտնաբերման մոնիթորինգը Հայաստանում դադարեցվել է մշտապես ցածր ցուցանիշներ ստանալու պատճառով: Սակայն նախարարությունը ևս մեկ մոնիթորինգ է անցկացնում ներկայիս իրավիճակը պարզելու համար»,- ասվում է ՀՀ բնապահպանության նախարարությունից «Նովոստի-Արմենիա» գործակալություն ուղարկված հաղորդագրության մեջ:

Միևնույն ժամանակ, ինչպես նշվում է փաստաթղթում, ադրբեջանական կողմի առաջարկով, որին համաձայնել են նաև հայկական և վրացական մասնագիտական աշխատանքային խմբերն ու փորձագետները, այդ հարցին վերջնական պատասխան տալու նկատառումով Եվրոմիության ՏԱՍԻՍ ծրագրի շրջանակներում իրականացվում է մակերևույթային ջրերի մեջ ֆենոլների պարունակության մոնիթորինգ: Միայն հետազոտությունների արդյունքները ցույց կտան գետավազանի իրական վիճակը, կբացահայտվեն իրական ճնշման գործոնները, ինչը թույլ կտա  մշակել ջրերի որակի կառավարման կամ բարելավման ծրագրեր:-0-