Քրեակատարողական հիմնարկի աշխատակցին մեղադրանք է առաջադրվել պաշտոնական անփութության համար

Հատուկ քննչական ծառայությունում ավարտվել է ՀՀ ԱՆ «Նուբարաշեն» քրեակատարողական հիմնարկի աշխատակցի կողմից պաշտոնական անփութության համար հարուցված քրեական գործի նախաքննությունը, երեքշաբթի «Նովոստի-Արմենիա» գործակալությանը տեղեկացրեցին ՀՀ գլխավոր դատախազության մամուլի ծառայությունից:

Տեղեկատվության համաձայն, նախաքննությամբ պարզվել է, քրեակատարողական հիմնարկի  անվտանգության ապահովման բաժնի երրորդ կարգի մասնագետ Գառնիկ Մովսիսյանը 2009թ. նոյեմբերի 1-ին նույն հիմնարկի պետի հրամանով  նշանակվել է  հերթապահության նոյեմբերի 1-ի առավոտյան ժամը 9-ից մինչև նոյեմբերի 2-ի  առավոտյան ժամը 9-ն ընկած ժամանակահատվածում` ստանձնելով  ներքին պահակակետի պահպանության և հսկողության պարտականությունները:

Նոյեմբերի 1-ին` ժամը 14:00-ի և 23:00-ի սահմաններում Մովսիսյանը  համապատասխան ծառայությունների կողմից  խցերում առաջացած շինարարական թերությունները վերացնելու համար  հերթափոխի խմբի պատասխանատու հերթապահին  դիմելու փոխարեն դատապարտյալ  Ա. Եղոյանին տրամադրել է  արգելված իրեր` մուրճ, հարթաշուրթ-աքցան`  իր պահպանությանն ու հսկողությանը  հանձնված 002 խցում  նորոգման աշխատանքներ կատարելու համար:

«Այսկերպ Մովսիսյանը խախտել է «ՀՀ ԱՆ քրեակատարողական ծառայության`  կալանավորվածներին պահելու վայրեր և ուղղիչ հիմնարկների ներքին կանոնակարգը հաստատելու մասին»  ՀՀ կառավարության  թիվ 1543-Ն որոշման պահանջները», - ասվում է տեղեկատվության մեջ:

Մամուլի ծառայությունից նշել են, որ չորս անգամ դատապարտված Եղոյանը, օգտվելով հսկողության բացակայությունից և օգտագործելով  իր տրամադրության տակ եղած մուրճը և հարթաշուրթ-աքցանը, տեղահան է արել խցի պատուհանի  պատի քարերը, կտրել է  խցի  արտաքին պատի մետաղացանցը և ազատազրկման վայրից դիմել փախուստի: Սակայն նույն օրը  հայտնաբերվել և բերման է ենթարկվել  ՀՀ ԱՆ «Նուբարաշեն» քրեակատարողական հիմնարկ:  

Ձեռք բերված ապացույցների հիման վրա Մովսիսյանին  մեղադրանք է առաջադրվել  ՀՀ քրեական օրենսգրքի  315-րդ հոդվածի 1-ին մասով (պաշտոնատար անձի կողմից ծառայության նկատմամբ անբարեխիղճ կամ անփույթ վերաբերմունքի հետևանքով իր պարտականությունները չկատարելը կամ ոչ պատշաճ կատարելը, որն անզգուշությամբ էական վնաս է պատճառել անձանց կամ կազմակերպությունների իրավունքներին ու օրինական շահերին կամ հասարակության կամ պետության օրինական շահերին (գույքային վնասի դեպքում՝ հանցագործության պահին սահմանված նվազագույն աշխատավարձի հազարապատիկի չափը գերազանցող գումարը կամ դրա արժեքը):

Քրեական գործն  ուղարկվել է Երևանի Կենտրոն և Նորք-Մարաշ վարչական շրջանների ընդհանուր  իրավասության առաջին ատյանի դատարան` ըստ էության քննելու համար:

Քրեական գործի նախաքննության օրինականության նկատմամբ  հսկողություն իրականացնող դատախազը հաստատել է  մեղադրական եզրակացությունը:

«Նուբարաշեն»  ՔԿՀ-ի  դատապարտյալ Եղոյանի` ՔԿՀ-ից փախուստի դիմելու դեպքի առթիվ հարուցված քրեական գործի նախաքննությունն իրականացրել է ոստիկանության` Էրեբունու քննչական բաժինը:-0-