ԵՐԵՎԱՆ, 1 փետրվարի. /Նովոստի-Արմենիա/. ՀՀ ԱԺ պատգամավորները երկուշաբթի քննարկել են Հյուսիս-Հարավ տրանսպորտային միջանցքի շինարարության համար Հայաստանի և Զարգացման ասիական բանկի միջև 500 մլն դոլար ընդհանուր գումարի շրջանակային ֆինանսական համաձայնագրի վավերացման հարցը:
«Համաձայնագիրը լիովին կանոնակարգում է տրանսպորտային միջանցքի շինարարության ծրագիրը, դրա իրականացումը թույլ կտա բարեկարգել տրասնպորտային ենթակառուցվածքն ու ավելացնել երթևեկության արագությունը»,- ասաց ՀՀ էկոնոմիկայի նախարար Ներսես Երիցյանը՝ պատգամավորներին ներկայացնելով համաձայնագրի պայմանները:
Ըստ նրա, շրջանակային համաձայնագիրը կանոնակարգում է 2010-2017թթ.-ի շինարարության ծրագիրը, և ներառում է, մասնավորապես, ենթակառուցվածքի բարեկարգման ու նորացման նախագծեր՝ նպաստելով մաքսային համակարգի զարգացման գործընթացին:
Երիցյանը հավելեց, որ համաձայնագրի համաձայն ԶԱԲ-ը Հայաստանին կտրամադրի 500 մլն դոլար արժեցող նախագծի իրականացումը, որից 38,4 մլն SDR կամ 60 մլն դոլարը առաջին տրանշը կկազմի:
Նախարարը պարզաբանեց, որ վարկը կտրամադրվի տարեկան մեկ տոկոս տոկոսադրույքով 8 տարի արտոնյալ ժամկետով, իսկ հաջորդ 24 տարվա ընթացքում տոկոսը կհասնի 1,5-ի:
Երիցյանը հավելեց, որ նախագծի իրականացումը թույլ կտա զգալիորեն կրճատել ճանապարհին լինելու ժամանակը, բարձրացնել ճանապարհների անցանելիությունը, որոնք անցանելի կլինեն ողջ տարին: Հյուսիս-հարավ տրանսպորտային միջանցքը, ինչպես հիշեցրեց նախարարը, կարևոր տարածաշրջանային նշանակություն ունի և կծառայի որպես Եվրոպա-Ասիա միջանցքի շարունակություն՝ դառնալով արևելքը արևմուտքին կապող ամենակարճ ուղին:
«Չի բացառվում, որ մեր հարևաններն օգտագործեն այդ ճանապարհը»,- ասաց նախարարը:
Ըստ նրա, ծախսված յուրաքանչյուր 70 մլն դոլարը 1-2 տոկոս լրացուցիչ տնտեսական աճ կապահովի, իսկ ծրագրի շահույթը 11-15 մլն դոլար: Երիցյանն ասաց, որ նախագծի իրականացումը բարդ ինժեներական որոշումներ կպահանջի, հետևաբար նաև լրացուցիչ աշխատանքներ:
ՀՀ կառավարությունը 2010 թ.-ի հունվարի 14-ին հավանություն է տվել Հյուսիս-Հարավ տրանսպորտային միջանցքի շինարարության ներդրումային ծրագրին, ինչպես նաև Հայաստանի և Զարգացման ասիական բանկի միջև 500 մլն դոլար ընդհանուր գումարի շրջանակային ֆինանսական համաձայնագրին և Հյուսիս-Հարավ միջանցքի շինարարության համար 60 մլն դոլարի չափով առաջին տրանշի տրամադրման համաձայնագրին, որոնք կնքվել են 2009 թ.-ի սեպտեմբերի 15-ին և 2009թ.-ի հոկտեմբերի 12-ին համապատասխանաբար:
2010թ.-ին Հայաստանում Հյուսիս-Հարավ ավտոտրանսպորտային միջանցքի շինարարության ծրագրի շրջանակներում ծրագրվում է 120 մլն դոլար գումարի աշխատանքներ իրականացնել: 2010թ.-ի համար նախատեսված 120 մլն դոլարի չափով միջոցները ընդգրկում են առաջին տրանշի 60 մլն դոլարը, ինչպես նաև ԶԱԲ-ի վերցված երկրորդ տրանշի միջոցների մի մասը: -0-
