Հայոց բանակը ոտնձգությունների դեպքում կջախջախի թշնամու ողջ զինական ուժը. ԶՈՒ ԳՇ
Հայոց բանակը ի զորու կլինի ջախջախել թշնամու ողջ զինական ուժը հայկական պետության նկատմամբ ոտնձգությունների դեպքում, ասվում է հունվարի 28-ին նշվող Հայկական բանակի օրվա կապակցությամբ ՀՀ Զինված ուժերի գլխավոր շտաբի պետ, գեներալ-գնդապետ Յուրի Խաչատուրովի ուղերձում:
«Վերջին շրջանում հաճախակի են դարձել հակառակորդի հոխորտանքները Ղարաբաղի հարցը ուժային միջոցներով լուծելու վերաբերյալ: Վստահ ենք, որ ոչ մի թշնամի չի համարձակվի խախտել մեր սահմանները` վերջնական հաղթանակի հույս ունենալով: Այդուամենայնիվ, եթե ոտնձգություն կատարվի մեր ժողովրդի ու պետության նկատմամբ, ապա Հայոց բանակը իր մարտական լավագույն որակների և հերոսական ոգու դրսևորումներով ի զորու կլինի ջախջախել թշնամու ողջ զինական ուժը», - ասվում է ՀՀ պաշտպանության նախարարության մամուլի ծառայությունից «Նովոստի-Արմենիա» գործակալությանը տրամադրած ուղերձում:
«Մեր բանակը չի պատրաստվում հարձակվել որևիցե մի երկրի վրա, այլ խնդիր ունի պաշտպանել հայրենի հողը: Մեր պայքարն արդար է և հաղթանակը մերն է լինելու», - նշել է ԶՈՒ Գլխավոր շտաբի պետը»:-0-
