Թուրքիան Հայաստանի ՍԴ որոշումը մեկնաբանելու իրավունք չունի. փորձագետ

Թուրքիան իրավունք չունի մեկնաբանելու Հայաստանի Սահմանադրական Դատարանի որոշումը՝ հայ-թուրքական արձանագրությունների վերաբերյալ, հինգշաբթի լրագրողներին հայտնեց Հայաստանի քաղաքագետների ասոցիացիայի ղեկավար Հմայակ Հովհաննիսյանը։

Ըստ նրա, Սահմանադրական դատարանը քաղաքական կառույց չէ, և նրա որոշումները քննարկման ենթակա չեն։

«Սահմանադրական դատարանի որոշման մեջ իբր նախապայմանների առկայության մասին իր հայտարարություններով կամ այլ մեկնաբանություններով Թուրքիան փաստորեն կասկածի տակ է դնում Հայաստանի սահմանադրական կարգը»,- ասաց փորձագետը։

Հովհաննիսյանի խոսքերով, Սահմանադրական դատարանն իշխանության անկախ ճյուղ է և կապված չէ քաղաքական համակարգի հետ, իսկ ՍԴ որոշումները վերջնական են և քննարկման ենթակա չեն։

«Զարմացնում է այն, որ Հայաստանի ոչ մի պաշտոնական անձ չի արտահայտվել այս առիթով, ցույց չի տվել Թուրքիային, որ ոչ ոք, առավել ևս, օտարերկրյա պետություն, իրավասու չէ պահանջելու ՍԴ որոշման դրույթների որևէ փոփոխություն», - ավելացրեց փորձագետը։

Հայաստանի և Թուրքիայի հարաբերությունները բավականին լարված էին մինչև այն ժամանակ, երբ երկու երկրի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

ՀՀ Սահմանադրական դատարանը հունվարի 12-ին հայ-թուրքական արձանագրություններում ամրագրված պարտավորությունները երկրի Մայր օրենքին համապատասխանող է ճանաչել:

Միաժամանակ Թուրքիայի արտաքին գործերի նախարարությունը երկուշաբթի հայտարարություն է տարածել, որում նշվում է, որ 2009 թվականի հոկտեմբերի 10-ին Ցյուրիխում ստորագրված հայ-թուրքական արձանագրությունների՝ Սահմանադրությանը համապատասխան ճանաչելու վերաբերյալ Հայաստանի Սահմանադրական Դատարանի որոշումը պարունակում է արձանագրությունների տառին և ոգուն չհամապատասխանող նախապայմաններ և սահմանափակող դրույթներ։  

Թուրքիայի վարչապետ Թայիպ Էրդողանը հունվարի 20-ին նախազգուշացրել է, որ Անկարայի և Երևանի միջև հարաբերությունների կարգավորման գործընթացը կարող է ձախողվել, եթե ՀՀ Սահմանադրական դատարանը չվերանայի նախորդ տարվա հոկտեմբերին Շվեյցարիայիում երկու երկրների միջև ստորագրված արձանագրությունների վերաբերյալ իր որոշումը: --0--