Հայ ժողովուրդը հպարտանում է իր հաղթանակած բանակով, հինգշաբթի «Եռաբլուր» պանթեոնում հայտարարել է ՀՀ վարչապետ Տիգրան Սարգսյանը:
«Ցանկանում եմ շնորհավորել մեր ժողովրդին ազգային տոնի՝ Բանակի օրվա կապակցությամբ: Այն համազգային տոն է, և մեզնից յուրաքանչյուրը հպարտությամբ է գալիս «Եռաբլուր», քանի որ մենք հաղթանակած բանակ ունենք», - հայտարարել է Սարգսյանը՝ նշելով, որ պետությունը պետք է անի ամեն ինչ ուժեղ բանակ ունենալու համար, որը հայկական պետության և հայ ժողովրդի անվտանգության և գոյության երաշխիքն է:
«Մեզ հեշտ կլինի հաղթահարել ժամանակակից աշխարհի բոլոր մարտահրավերներն ու սպառնալիքները, եթե մենք վստահ լինենք, որ մեր ետևում ուժեղ և հուսալի բանակ է կանգնած», - ասել է կառավարության ղեկավարը:
Հայաստանի Հանրապետության բանակի 18-ամյակի տոնակատարությունների շրջանակներում ՀՀ նախագահ Սերժ Սարգսյանը երկրի քաղաքական ղեկավարության և ուժային գերատեսչությունների ղեկավարների ուղեկցությամբ հինգշաբթի առավոտյան այցելել է «Եռաբլուր» պանթեոն, որտեղ ծաղկեպսակներ է դրել Զոհված հերոսների հուշահամալիրին:
Հայաստանում հինգշաբթի նշվում է Հայկական բանակի հիմնադրման 18-ամյակը, ինչը սերտորեն կապված է հայկական անկախ պետության կայացման հետ: Հայկական բանակի շնորհիվ հաջողվեց պաշտպանել Արցախի անկախությունն ու անսասան պահել Հայաստանի սահմանները:
Հայկական բանակի ստեղծման օրը համարվում է 1992 թվականի հունվարի 28-ը, երբ Հայաստանը պատմական որոշում ընդունեց «Հայաստանի Հանրապետության պաշտպանության նախարարության մասին», և հրապարակվեց նախարարի առաջին հրամանը։ -0-
