ԵՐԵՎԱՆ, 28 հունվարի. /Նովոստի-Արմենիա/. Իրանը կողմ է ղարաբաղյան հակամարտության խաղաղ կարգավորմանը և պատրաստ է անհրաժեշտ օգնություն ցուցաբերել Հայաստանին և Ադրբեջանին, չորեքշաբթի Երևանում ճեպազրույցի ժամանակ ասել է Իրանի ԱԳ նախարար Մանուչեհր Մոթաքին:
«Հայաստանն ու Ադրբեջանը Իրանի հարևաններն ու բարեկամներն են: Մենք ապրում ենք նույն տարածաշրջանում, և մեր նպատակը այդ տարածաշրջանում խաղաղություն և կայունություն ապահովելն է: Մենք բոլորս շատ լավ հիշում ենք 2008թ.-ի օգոստոսին Վրաստանում տեղի ունեցած իրադարձությունները, և տարածաշրջանում նման դեպքեր չպետք է տեղի ունենան», - հայտարարել է Մոթաքին հայ-իրական միջկառավարական հանձնաժողովի 9-րդ նիստի ավարտից հետո:
Նրա խոսքերով, օգոստոսյան իրադարձությունների ժամանակ տուժեցին տարածաշրջանի անվտանգությունը, տրանսպորտի և էներգետիկայի ոլորտները: Իրանի ԱԳ նախարարը հիշեցրել է, որ օգոստոսյան իրադարձություններից հետո նա այցելել է տարածաշրջանի երկրների մի շարք մայրաքաղաքներ, որտեղ բանակցությունների ժամանակ հայտարարվել է տարածաշրջանի կայունության վերականգնման անհրաժեշտության մասին:
«Եվ մեկ անգամ ընդգծում եմ, որ մենք ղարաբաղյան հակամարտության խաղաղ կարգավորման կողմնակիցն ենք՝ Հայաստանի և Ադրբեջանի միջև բանակցությունների միջոցով», - նշել է Մոթաքին:
Նա նաև ավելացրել է, որ ղարաբաղյան հարցը քննարկվել է ՀՀ նախագահ Սերժ Սարգսյանի և արտգործնախարար Էդվարդ Նալբանդյանի հետ հանդիպումների ժամանակ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
