ԵՐԵՎԱՆ, 27 հունվարի. /Նովոստի-Արմենիա/. Հայաստանի առևտրաարդյունաբերական պալատը 2010 թվականին նախատեսում է պայմանագիր ստորագրել ցուցահանդեսներ կազմակերպող թուրքական ամենախոշոր ընկերություններից մեկի «Թույափ»-ի հետ, չորեքշաբթի լրագրողներին հայտնեց պալատի գործադիր տնօրեն Արայիկ Վարդանյանը։
«Փետրվարի կեսերին նախատեսված է պալատի նախագահ Մարտին Սարգսյանի այցը Ստամբուլ՝ «Թույափ» ցուցահանդեսային կենտրոնի հետ պայմանագիր ստորագրելու համար»,- ասաց նա։
Վարդանյանի խոսքերով, «Թույափ» կենտրոնի հետ կքննարկվի Թուրքիայում հայկական արտադրանքի ցուցահանդեսների կազմակերպման հարցը, և համապատասխանաբար, թուրքական ապրանքների ցուցահանդեսների հարցը Հայաստանում։
Այդ համատեքստում Վարդանյանն ընդգծեց երկու երկրի պալատների միջև երկկողմ համագործակցության հաստատման շահագրգռվածությունը։
Այս կապակցությամբ նա նշեց, որ Հայաստանի ԱԱՊ-ն փորձում է համագործակցություն հաստատել իր թուրք գործընկերների հետ։
«2009 թվականի վերջին Հայաստան ժամանեցին Վանի ԱԱՊ ներկայացուցիչներ՝ զբոսաշրջության ոլորտում համագործակցության առաջարկով, մասնավորապես, դեպի պատմական վայրեր Հայաստանից և հայկական սփյուռքից զբոսաշրջիկների ներգրավման համար»,- միաժամանակ հայտարարեց Վարդանյանը։
Ինչպես նշեց Վարդանյանը, թուրքական ԱԱՊ ներկայացուցիչներն առաջարկել էին համագործակցել մինչ երկու երկրի քաղաքական ուժերի միջև համաձայնագրի ստորագրումը։
Հայաստանի և Թուրքիայի հարաբերությունները բավականին լարված էին մինչև այն ժամանակ, երբ երկու երկրի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Հայաստանի Ազգային վիճակագրական ծառայության տվյալներով, Թուրքիայի հետ Հայաստանի ոչ պաշտոնական արտաքին ապրանքաշրջանառությունը 2009 թվականի հունվար-նոյեմբեր ամիսների ընթացքում կրճատվել է 36,9 տոկոսով և կազմել շուրջ 159 մլն դոլար։ -0-
