Հայկական բանակը հուսալիորեն պաշտպանում է հայրենիքի սահմանները, չորեքշաբթի հայտարարեց Հայաստանի պաշտպանության նախարար Սեյրան Օհանյանը հայկական բանակի 18-ամյակին նվիրված հանդիսավոր արարողության ընթացքում։
«Հայկական բանակն այսօր կատարելագործվում է, հուսալիորեն պաշտպանում է Հայրենիքի սահմանները և միջազգային հեղինակություն է վայելում»,- ասաց Օհանյանը։ Նրա խոսքերով, Հայաստանի Զինված ուժերը համարվում են տարածաշրջանի ամենամարտունակներից մեկը։
Միաժամանակ, Հայաստանի պաշտպանության նախարարը նշեց, որ Հայաստանին հասցեագրված ռազմատենչ հայտարարություններն ու սպառնալիքները նրան չեն վախեցնում, այլ միայն խթանում են մշտական զարգացումն ու կատարելագործումը։
«Մենք հաղթանակ տարած բանակ ենք և խաղաղության կողմնակից, և պարբերաբար հնչող սպառնալիքները մեզ չեն վախեցնում։ Մենք պահպանում ենք զգոնությունն ու մշտապես կատարելագործվում ենք»,- ընդգծեց նախարարը։ -0-
