Հայաստանում ՃՏՊ-ների թվի աճի միտումը դադարել է. Ճանապարհային ոստիկանության պետ

Հայաստանում 2009 թ.-ին ճանապարհատրանսպորտային պատահարների թվի աճի միտումը դադարել է, չորեքշաբթի մամուլի ասուլիսի ժամանակ հայտարարեց ՀՀ ճանապարհային ոստիկանության պետ Մարգար Օհանյանը:

«2009 թվականը բեկումնային էր Ճանապարհային ոստիկանության աշխատանքում, քանի որ մեզ հաջողվեց վերջապես դադարեցնել ճանապարհատրանսպորտային պատահարների աճի միտումը», - ասաց Օհանյանը՝ նշելով, որ ոստիկանությունն ունի համապատասխան դաշտ՝ ձեռք բերված արդյունքները պահպանելու և բարելավելու համար:

Օհանյանի կողմից ներկայացված տվյալների համաձայն՝ 2003 թ.-ից ՃՏՊ-ների թիվը Հայաստանում տարեցտարի ավելանում էր՝ 2008 թ.-ին հասնելով 2202 դեպքի, ինչի հետևանքով զոհվել է 407 մարդ:

2008 թ.-ի համեմատ 2009 թ.-ին ՃՏՊ-ների թիվը կրճատվել է և կազմել 2000, տուժածների թիվը կազմել է 2753, զոհվածներինը՝ 325:

Օհանյանը նաև նշեց, որ 2009 թ.-ին ճանապարհային ոստիկանությունը ձերբակալել է ավտոմեքենաների կողոպտիչների և առևանգիչների:

ՀՀ ճանապարհային ոստիկանության պետը նշեց, որ հիմնականում բոլոր փողոցներն ունեն հետիոտնի համար նախատեսված անցումներ և լուսացույցեր: Սակայն կան դեպքեր, երբ խանութների տերերն ինքնակամ ներկում են անցումները՝ վերածելով դրանք կետագծայինի՝ դրանով իսկ չթույլատրված վայրերում կայանատեղեր ապահովելով: Ճանապարհային ոստիկանությունն աշխատում է այդ ուղղությամբ:

Ճանապարհային ոստիկանության տեխնիկական զինման կապակցությամբ Օհանյանը տեղեկացրեց, որ ծրագրվում է ռադարներ տեղադրել Երևանում և Հայաստանի մարզերում: Նաև կվերականգնվեն 14 խաչմերուկներ, որտեղ կլինեն կարգավորող ոստիկաններ և լուսացույցեր:   

«Մենք ցանկանում ենք ճանապարհային երթևեկությանը հետևելու և փողոցներում կարգուկանոնը պահպանելու համար տեսախցիկներ տեղադրել սկզբում Երևանի կենտրոնում, այնուհետև քաղաքի ծայրամասերում», - ասաց նա:-0-