ՀՀ նախագահին առնթեր Սևանա լճի խնդիրների հանձնաժողովն առաջարկում է 3-4 տարով արգելել ձկան որսը լճում դրա բիոռեսուրսները վերականգնելու նպատակով, երեքշաբթի մամուլի ասուլիսի ժամանակ հայտարարեց հանձնաժողովի նախագահ Վլադիմիր Մովսիսյանը:
«Մենք առաջարկում ենք 3-4 տարով լիովին արգելել ձկան որսը Սևանա լճում՝ բացառությամբ ծածանի և խեցգետնի որսից ափամերձ գոտիներում»,- ասաց Մովսիսյանը:
Ըստ նրա, սա անհրաժեշտ է, որպեսզի լիճ բաց թողնված «բախտակ» և «գեղարքունիք» տեսակի 307 հազ. մանրաձուկը սեռահասուն վիճակի հասնի:
Սևանա լճի խնդիրների հանձնաժողովը պատրաստվում է նաև կառավարության քննարկմանը ներկայացնել Սևանում ձկնորսության վերահսկողության և ձկան որսի արտոնագրման կարգի խստացման միջոցները:
Սևանա լճի խնդիրների հանձնաժողովը ստեղծվել է ՀՀ նախագահ Սերժ Սարգսյանի կարգադրությամբ 2008 թ.-ի դեկտեմբերին: Դրա կազմում են խորհրդարանական հանձնաողովների ղեկավարներ, կառավարության անդամներ, փոխնախարարներ, պետական գերատեսչությունների ղեկավարներ, հասարակական կազմակերպությունների ղեկավարներ: -0-
