Ադրբեջանը նոր պատերազմ սկսելու դեպքում կարող է անգամ կորցնել իր ինքնավարությունը, երեքշաբթի լրագրողներին հայտարարեց ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ, Դաշնակցություն խմբակցության անդամ Հրայր Կարապետյանը:
«Եթե առաջին պատերազմի ժամանակ (1991-1994 թթ.) հարձակվող կողմը կորցրեց 7 շրջան, ապա այս դեպքում կկորցնի իր ինքնիշխանությունը: Համեմատած առաջին պատերազմի հետ՝ այժմ հայկական բանակը շատ ավելի հզոր է, և պատասխան հարվածը շատ ավելի ուժեղ կլինի», - ասաց նա: Կարապետյանն ընդգծեց, որ Ադրբեջանում պետք է հասկանան, որ ռազմական ճանապարհով ղարաբաղյան հակամարտությունը լուծելն անհնար է:
«Մենք հասկանում ենք, որ նրանց բնակչությունն ավելի շատ է, փողն ավելի շատ է, նրանք նավթ ունեն, սակայն մենք կազմակերպված ենք, մենք ունենք կամք և այն բանի գիտակցումը, որ պատերազմի դեպքում մենք պաշտպանելու ենք մեր Հայրենիքը, այլ ոչ թե զավթելու ենք օտարինը», - նշեց նա:
Կարապետյանը նաև հիշեցրեց, որ առաջին պատերազմի ժամանակ ևս Ադրբեջանը գերազանցություն ուներ, սակայն այդ երկիրը պարտություն կրեց՝ ավելացնելով, որ պատերազմում ամեն ինչ չէ, որ որոշում է քանակական գերազանցությունը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
