ԵԱՀԿ ՄԽ համանախագահները Հայաստանի նախագահին փոխանցեցին Ղարաբաղի վերաբերյալ «մադրիդյան սկզբունքների» նորացված տարբերակը

Երևանում Հայաստանի նախագահ Սերժ Սարգսյանի և ԵԱՀԿ Մինսկի խմբի համանախագահներ Յուրի Մերզլյակովի (Ռուսաստան), Բեռնար Ֆասյեի (Ֆրանսիա) և Ռոբերտ Բրադտկեի (ԱՄՆ) հետ կայացած հանդիպմանը երկրի ղեկավարին փոխանցվեց ղարաբաղյան հակամարտության կարգավորման «մադրիդյան սկզբունքների» նորացված տարբերակը, տեղեկանում ենք ԵԱՀԿ պաշտոնական կայքից։

«Իրենց նախագահների հանձնարարականով 2009 թվականի հուլիսին Ակվիլայում ՄԽ համանախագահները նախագահ Սարգսյանին, ինչպես դրանից առաջ Ադրբեջանի նախագահ Ալիևին,  փոխանցեցին Մադրիդյան փաստաթղթի կատարելագործված տարբերակը, որը պարունակում էր համանախագահների կողմից ներկայացրած բազային սկզբունքների վերջին ձևակերպումները»,- ասվում է հաղորդագրությունում։

Հաջորդ օրը համանախագահները Բաքվում հանդիպեցին նախագահ Ալիևին։

Ինչպես ասվում է հաղորդագրությունում, երկու նախագահները համանախագահների հետ հանդիպման ընթացքում արտահայտեցին իրենց հավատարմությունը ղարաբաղյան հակամարտության խաղաղ կարգավորման գործընթացը շարունակելու գործին։

Աստանայից հետո խորհրդակցությունները կշարունակվեն Սոչիում, որտեղ Ռուսաստանի նախագահ Դմիտրի Մեդվեդևի հրավերով հունվարի 25-ին կկայանա Հայաստանի և Ադրբեջանի առաջնորդների հերթական հանդիպումը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:

-0-