Եվրոպայի հայկական միությունների ֆորումը (ԵՀՄՖ) խստորեն դատապարտում է Թուրքիայի վարչապետի և ԱԳ նախարարի վերջերս կատարած հայտարարությունները՝ կապված ՀՀ Սահմանադրական դատարանի հայ-թուրքական արձանագրությունների վերաբերյալ որոշման հետ՝ գնահատելով այդ քայլը որպես հայ-թուրքական արձանագրություններից հրաժարվելու փորձ:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
ՀՀ Սահմանադրական դատարանը 2009թ. հունվարի 12-ին երկրի Սահմանադրությանը համապատասխանող ճանաչեց «Հայաստանի Հանրապետության և Թուրքիայի Հանրապետության միջեւ դիվանագիտական հարաբերությունների հաստատման մասին» ու «Հայաստանի Հանրապետության եւ Թուրքիայի Հանրապետության միջև երկկողմ հարաբերությունների զարգացման մասին» արձանագրություններում ամրագրված պարտավորությունները:
Թուրքիայի վարչապետ Թայիպ Էրդողանը հունվարի 20-ին զգուշացրել է, որ Երևանի ու Անկարայի միջև հարաբերությունների նորմալացման գործընթացը կարող է ընդհատվել, եթե ՀՀ ՍԴ-ն չվերանայի երկու երկրների միջև արձանագրությունների առնչությամբ իր որոշումը՝ ստորագրված անցյալ տարվա հոկտեմբերին Շվեյցարիայում:
«ԵՀՄՖ-ն կանի այն ամենը, ինչ անհրաժեշտ է Թուրքիայի իշխանությունների անվճառական քայլերը Եվրոպայում ներկայացնելու և մեկնաբանելու ուղղությամբ: Մոտակա ժամանակահատվածում Թուրքիայի խորհրդարանի կողմից վերոհիշյալ արձանագրությունները չվավերացնելու դեպքում կատարված աշխատանքը վիժեցնելու պատասխանտվությունն ամբողջովին դրվելու է թուրքական իշխանությունների վրա՝ դրանից բխող ողջ հետևանքներով հանդերձ»,- ասվում է Ֆորումի կողմից «Նովոստի-Արմենիա» գործակալությանը տրամադրված հաղորդագրության մեջ:
Փաստաթղթում նշվում է նաև, որ ԵՀՄՖ-ն լիովին սատարում է ՀՀ նախագահի և ԱԳ նախարարի կողմից կատարված քայլերը՝ հայ-թուրքական արձանագրությունների սահմանադրական դատարանի հաստատած տարբերակով աշխատելու ուղղությամբ:
«ԵՀՄՖ նախագահությունը կարծում է, որ ՀՀ-ն կատարում է բոլոր այն պարտականությունները, որոնք նախատեսված էին ստորագրված արձանագրություններով»,- նշվում է հայտարարության մեջ: -0-
