Բաքվի հայերի ջարդերը 1915 թ.-ի Հայոց ցեղասպանության շարունակությունը դարձան. պատգամավոր

1990 թ.-ի Բաքվի ջարդերը դարձան 1915 թ.-ին Օսմանյան կայսրությունում տեղի ունեցած Հայոց ցեղասպանության շարունակությունը, կարծում է «Ժառանգություն» ընդդիմադիր խմբակցության քարտուղար Լարիսա Ալավերդյանը:

«1990 թ.-ին Բաքվում տեղի ունեցած հայերի ջարդերը ոչ միայն էթնիկ զտումների քաղաքականության շարունակությունն են, որը Ադրբեջանի Հանրապետությունը ժառանգել է իր գոյության առաջին օրվանից, այլև դարձան 1915 թ.-ին հայերի նկատմամբ երիտթուրքերի դաժան, անբարոյական, անմարդկային քաղաքականության շարունակությունը», - ասաց Ալավերդյանը Բաքվում հայկական ջարդերի զոհերի հիշատակին նվիրված սգո միջոցառման ժամանակ, որը տեղի է ունեցել երեքշաբթի Հայոց ցեղասպանության զոհերի հուշահամալիրում:

Նրա խոսքերով՝ Բաքվի ջարդերը թուրքերի կողմից ժառանգած դաժան և բարբարոսական քաղաքականության շարունակությունն են:

Ալավերդյանը կարծում է, որ երկու ցեղասպանություններն էլ (1915 թ.-ին Թուրքիայում և 1990 թ.-ին Բաքվում) նույն նպատակներն են հետապնդել և նույն սցենարն են ունեցել՝ պայմաններ ստեղծել հայերի ոչնչացման միջոցով պանթուրքիզմի գաղափարների զարգացման համար:

Միաժամանակ պատգամավորը նշեց, որ հայ ժողովրդի դեմ նման հանցագործությունները մարդկության դեմ իրագործված հանցագործություններ են, որոնց բոլոր մեղավորները պետք է պատասխանատվություն կրեն:

Բաքվի հայկական ջարդերը սկսվել էին 1990թ. հունվարի 13-ին ու շարունակվել 7 օր: Հայաթափության նպատակաուղղված քաղաքականության արդյունքում այնտեղ բնակվող 300 հազար հայերից գրեթե բոլորը լքեցին քաղաքը: Ըստ Human Rights Watch-ի զեկուցող Ռոբերտ Քուշենի, «ջարդերը տարերային չէին, քանի ջարդարարներն ունեին հայերի ցուցակներն ու հասցեները»: Ջարդերը շարունակվեցին այնքան ժամանակ, մինչև Բաքու մտավ խորհրդային զորքը:-0-