Կենտրոն և Նորք-Մարաշ համայնքների առաջին ատյանի դատարանը երեքշաբթի կ «Հայկական ժամանակ» թերթի խմբագիր Նիկոլ Փաշինյանին դատապարտել է յոթ տարվա ազատազրկման:
Ընդդիմադիր թերթի խմբագիրը մեղադրվում է 2007 թ.-ի հոկտեմբերի 23-ին ոստիկանության աշխատակցի դեմ կյանքին վտանգ չներկայացնող բռնություն կիրառելու և մի խումբ անձանց հետ Երևանում 2008 թ.-ի մարտի 1-2-ին զանգվածային անկարգություններ կազմակերպելու մեջ:
Ինչպես տեղեկացնում է «Նովոստի-Արմենիա» գործակալության թղթակիցը դատարանի շենքից, դատավոր Մնացական Մարտիրոսյանն արդարացրեց Փաշինյանին Հայաստանի Քրեական օրենսգրքի 316-րդ հոդվածի առաջին մասով (բռնության կիրառում իշխանության ներկայացուցչի նկատմամբ) նախատեսված հանցագործության կատարման մեղադրանքով։
Միաժամանակ դատարանը մեղավոր ճանաչեց Փաշինյանին 225-րդ հոդվածի առաջին մասով (զանգվածային անկարգություններ) և դատապարտեց նրան 7 տարի ազատազրկման՝ Հայաստանի արդարադատության նախարարության համապատասխան քրեակատարողական հիմնարկում պատիժ կրելով։ Դատավճիռը կարող է բողոքարկվել Վերաքննիչ դատարանում տասն օրվա ընթացքում։
Ինչպես տեղեկացնում է «Նովոստի-Արմենիա» գործակալության թղթակիցը, Փաշինյանն ընդունեց դատարանի որոշումը դժգոհությամբ և «պայքար, պայքար մինչև վերջ» վանկարկելով։
Ներկայում դատարանի բակում դատավճռի վերաբերյալ իրենց դժգոհությունն են հայտնում Փաշինյանի կողմնակիցները։
Փաշինյանի փաստաբան Լուսին Սահակյանը լրագրողներին հայտնեց, որ պաշտպանությունը կբողոքարկի դատարանի որոշումը, սակայն նա վստահ չէ, որ «բարձր դատական ատյաններն արդար վճիռ կկայացնեն»։
Փաշինյանի նկատմամբ դատավարությունը սկսվել է 2009թ. հոկտեմբերի 20-ին Կենտրոն և Նորք-Մարաշ համայնքների առաջին ատյանի դատարանում։
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։-0-
