ԵՐԵՎԱՆ, 19 հունվարի. /Նովոստի-Արմենիա/. Շվեյցարիան 2009 թվականին ապաստան տրամադրելու 90 հարցում է ստացել Հայաստանի քաղաքացիներից, հաղորդում է «Մեր թերթը» շվեյցարական պորտալը՝ հղում անելով Շվեյցարիայի միգրացիայի դաշնային ծառայությանը (ODM)։ Պարբերականի տվյալների համաձայն, ներկայում բավարարվել է Հայաստանի քաղաքացիների միայն մեկ խնդրանք։
Բացի այդ, 19 հարցում է ստացվել Ադրբեջանի փախստականներից (մեկ դրական պատասխան՝ 7 դեպքում), 76 հարցում՝ Բելառուսից, 15-ը՝ Ղազախստանից, 6-ը՝ Ղրղզստանից (տրվել է 4 ապաստան), 15-ն՝ Ուզբեկստանից, մեկը Թուրքմենիայից և 29 հարցում Ուկրաինայի փախստականներից։
452 հարցում է ստացվել Ռուսաստանի Դաշնության քաղաքացիներից, որոնցից 45 խնդրանքը բավարարվել է, իսկ 251-ը՝ մերժվել հիմնարար պատճառների բացակայության պատճառով։
Ինչպես հաղորդում է «Մեր թերթը», ընդհանուր առմամբ, Շվեյցարիայից 2009 թվականին ապաստան խնդրած փախստականների թիվը կազմել է 16 005 մարդ, ինչը 3,6 տոկոսով ցածր է նախանցյալ տարվա ցուցանիշից։
Նախորդ տարի շվեյցարական կառավարությունը մերժել է 5 750 խնդրանք (4 483 հարցում 2008 թվականին), իսկ 7 678 դեպք ընդհանրապես հրաժարվել է քննարկել՝ ընդունելով այսպես կոչված NEM որոշում՝ «ապաստան խնդրելու հիմնարար պատճառների բացակայություն», այսինքն գրեթե երկու անգամ ավելի, քան նախանցյալ տարում (3 073 NEM)։
Հիմնականում ապաստան են խնդրում այն երկրների փախստականները, որտեղ ռազմական գործողություններ են ընթանում՝ Շրի Լանկայից (Թամիլի ապստամբական շարժման մասնակիցների՝ Թամիլ-Իլամի ազատագրման Վագրերի դեմ կառավարության ճնշումից փրկվողներ), ինչպես նաև Իրաքից, Սոմալիից և Աֆղանստանից։
Մեծ թվով հարցումներ են ստացվում Սերբիայի, Կոսովոյի, Վրաստանի և Թուրքիայի բնակիչներից։ Ճիշտ է՝ Սերբիան և Կոսովոն 2009 թվականի ապրիլից Դաշնային խորհրդի կողմից որակվել են որպես շատ թե քիչ հանգիստ երկրներ, ինչի արդյունք է դարձել միջնորդությունների թվի կրճատումը։ Վրաստանի փախստականներից ստացվել է 638 խնդրանք, որոնցից 549 դեպքը ճանաչվել է անհիմն և չի դիտարկվել (NEM)։ -0-
