ԵՐԵՎԱՆ, 15 հունվարի. /Նովոստի-Արմենիա/. Freedom House-ի գնահատականը՝ Հայաստանում քաղաքական ազատությունների հետընթացի առնչությամբ, չի համապատասխանում իրականությանը, լրագրողներին հայտարարեց ՀՀԿ խորհրդարանական խմբակցության քարտուղար Էդուարդ Շարմազանովը:
«Չնայած ես համաձայն եմ, որ քաղաքական իրավիճակը և քաղաքական կուլտուրայի մակարդակը Հայաստանում կատարյալ չեն, ես այն կարծիքին չեմ, որ վերջին տարիներին Հայաստանում քաղաքացիական ու քաղաքական ազատությունների ոլորտում հետընթաց է եղել»,- ասաց նա:
Ի հաստատում իր խոսքերի, նա օրինակ բերեց նախագահ Սարգսյանի հանդիպումները ՀՀ տարբեր քաղաքական կուսակցությունների առաջնորդների հետ, անցկացվող ընտրությունների որակի բարձրացումը, ինչը նշվել է միջազգային կազմակերպությունների կողմից, և ԶԼՄ-ների ազատականացումը:
Ըստ նրա, չնայած այն հեղինակությանն ու հարգանքին, որ կազմակերպությունը վայելում է ողջ աշխարհում, նրա շատ գնահատականներ սուբյեկտիվ բնույթ են կրում: Շարմազանովը նշեց, որ Freedom House-ը ԱՄՆ գաղափարախոսական գիծը սատարելու համար ստեղծված կազմակերպություն է և նրա ոչ բոլոր եզրակացություններն են անաչառ:
Freedom House ոչ կառավարական կազմակերպության «Ազատությունը աշխարհում 2010» հերթական զեկույցի համաձայն՝ Հայաստանում, ինչպես և հետխորհրդային տարածքի պետությունների մեծ մասում, քաղաքական ու քաղաքացիական ազատությունների հետընթաց է նկատվում։
Freedom House-ի փորձագետների գնահատականով, ինչպես և նախորդ տարի, «ազատ-մասնակի ազատ-անազատ երկրներ» դասակարգման մեջ Հայաստանը դասվում է «մասամբ ազատ» երկրների շարքում:
Freedom House-ի սահմանած քաղաքական ազատությունների գնահատման յոթբալանոց սանդղակով քաղաքական ազատությունների մակարդակը Հայաստանում գնահատվում է յոթ բալ, ինչպես և անցյալ տարի։
Ընդհանուր առմամբ 2009 թ.-ի արդյունքներով կազմակերպությունը «անազատ» է ճանաչել 47 երկիր անցյալ տարվա 42-ի փոխարեն, ազատ՝ 89 երկիր, մասամբ ազատ՝ 58 երկիր։
Freedom House-ը 1972 թ.-ից ամեն տարի հրապարակում է Freedom in the World զեկույցը, որում գնահատվում է քաղաքական ու քաղաքացիական ազատությունների հետ կապված իրավիճակը աշխարհի ավելի քան 190 երկրներում և տարածաշրջաններում։ -0-
