Հարավկովկասյան երկաթուղու բեռնափոխադրումների աճը 2009 թվականին միջինը կազմել է 3,2 տոկոս, «Նովոստի-Արմենիա» գործակալությանը հայտնեցին ՀԿԵ մամուլի ծառայությունից։
«Հարավկովկասյան երկաթուղի» ՓԲԸ տեղեկատվական կենտրոնի տրամադրած տվյալների համաձայն, բեռնափոխադրումները նախորդ 2009 թվականի ընթացքում կատարվել են հետևյալ ծավալներով՝ ներկրումը կազմել է 1 328 366 տոննա, արտահանումը՝ 345 495 տոննա։
Ներկրումը հիմնականում ձևավորվել է հացահատիկային արտադրանքից՝ 467 484 տոննա, նավթամթերքից՝ 363 035 տոննա, բեռնարկղային փոխադրումներից՝ 137 733 տոննա։
2009 թվականի արտահանման տվյալները հետևյալն են՝ ցեմենտ՝ 117 319 տոննա, բեռնարկղային փոխադրումներ՝ 82 062 տոննա, հանքարդյունաբերական հումք՝ 79 323 տոննա։
Բեռնափոխադրումների ծավալը զգալիորեն աճել է ներքին հաղորդակցման դեպքում՝ կազմելով 1 066 317 տոննա։ Ներքին բեռնափոխադրումները հիմնականում ձևավորվել են գունավոր մետաղից՝ 84 835 տոննա, ծծմբահումքից՝ 466 430 տոննա, հանքային բնական շինանյութից՝ 200 710 տոննա, հանքարդյունաբերական հումքից՝ 156 837 տոննա։
Հարավկովկասյան երկաթուղին «Ռուսական երկաթուղի» ԲԲԸ-ի հարյուրտոկոսանոց ակտիվն է, որը ստեղծվել է հատուկ Հայկական երկաթուղիները ղեկավարելու համար։
Հայաստանի երկաթուղիների 1125կմ-ից 805 կմ-ը ՀԵ-ի ենթակայության տակ է գտնվում։
2008 թվականի հունվարի 16-ին ՌԵ ընկերությունը հաղթող է ճանաչվել Հայկական երկաթուղիները կոնցեսիոն կառավարման հանձնելու մրցույթում։ 2007թ. դեկտեմբերի 21-ին հրապարակված ֆինանսական առաջարկում ՌԵ-ն հայտարարել է «Հայկական երկաթուղիներ»-ում 570 մլն դոլար ներդնելու պատրաստակամության մասին, որից 230 միլիոնը՝ մոտակա հինգ տարվա ընթացքում։ -0-
