Ռուսաստանը շահագրգռված է հայ-թուրքական հարաբերությունների շուտափույթ կարգավորմամբ. Լավրով

Ռուսաստանը շահագրգռված է հայ-թուրքական հարաբերությունների շուտափույթ կարգավորմամբ, հինգշաբթի մամուլի ասուլիսի ժամանակ հայտարարեց ՌԴ ԱԳ նախարար Սերգեյ Լավրովը:

«Ռուսաստանը կրկին հաստատում է այդ հարցի շուրջ ունեցած իր դիրքորոշումը: Ես հայտարարում եմ, որ մենք շահագրգռված ենք Հայաստանի և Թուրքիայի միջև հարաբերությունների կարգավորմամբ: Որքան շուտ դա տեղի ունենա, այդքան ավելի լավ կլինի տարածաշրջանի համար», - ասաց նա:

Լավրովը հիշեցրեց, որ ներկա է գտնվել Ցյուրիխում հայ-թուրքական արձանագրությունների ստորագրման արարողությանը և նշեց, որ Ռուսաստանը պատրաստ է աջակցություն ցուցաբերել հարաբերությունների կարգավորման գործընթացում ենթակառուցվածքային նախագծերի իրագործման միջոցով, մասնավորապես՝ երկաթուղային հաղորդագրության ոլորտում:

«Մենք պատրաստ ենք օգնություն ցուցաբերել, երբ կողմերը պատրաստ լինեն», - ասաց նա:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

ՀՀ Սահմանադրական դատարանը հունվարի 12-ին հայ-թուրքական արձանագրություններում ամրագրված պարտավորությունները երկրի Մայր օրենքին համապատասխանող է ճանաչել, ինչից հետո փաստաթուղթը կներկայացվի խորհրդարանին:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ղարաբաղյան հարցում ադրբեջանական դիրքորոշման պաշտպանությամբ, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-