Բաքուն շարունակում է վտանգ ներկայացնել տարածաշրջանի համար, ասել է Հայաստանի արտաքին գործերի փոխնախարար Շավարշ Քոչարյանը՝ ժամանակակից իրավիճակի տեսանկյունից գնահատելով 1990 թվականին Ադրբեջանի մայրաքաղաքում տեղի ունեցած հայկական ջարդերը։
«Այն, ինչ կատարվեց 20 տարի առաջ Բաքվում` ի պատասխան Լեռնային Ղարաբաղի ժողովրդի ինքնորոշման պահանջի, Ադրբեջանի կողմից ի սկզբանե որդեգրած ուժային եւ էթնիկական զտումների քաղաքականության հերթական հրեշավոր դրսեւորումն էր»,- մեջբերեցին Քոչարյանի խոսքերը Հայաստանի ԱԳՆ մամուլի ծառայությունից։
Հայաստանի արտաքին գործերի նախարարության ղեկավարի տեղակալի խոսքերով, դրա հետևանքն Ադրբեջանից շուրջ 400 հազար հայերի բռնի տեղահանումն էր և ինքնորոշված Լեռնային Ղարաբաղի Հանրապետության դեմ լայնածավալ ռազմական ագրեսիան, որոնք հանգեցրեցին ծանր մարդկային եւ նյութական կորուստների։
«Այն փաստը, որ Ադրբեջանն իր պատասխանատվությունն ու մեղքը կատարված հանցագործությունների և սանձազերծված ագրեսիայի հետեւանքների համար ընդունելու փոխարեն շարունակում է հակահայկական հիստերիան և սուր ճոճելը, վկայում է, որ Բաքուն առ այսօր շարունակում է վտանգ ներկայացնել իր իսկ բնակչության և տարածաշրջանի համար»,- ասել է Քոչարյանը։
Բաքվի հայկական ջարդերը սկսվել էին 1990թ. հունվարի 13-ին ու շարունակվել 7 օր: Հայաթափության նպատակաուղղված քաղաքականության արդյունքում այնտեղ բնակվող 300 հազար հայերից գրեթե բոլորը լքեցին քաղաքը: Ըստ Human Rights Watch-ի զեկուցող Ռոբերտ Քուշենի, «ջարդերը տարերային չէին, քանի ջարդարարներն ունեին հայերի ցուցակներն ու հասցեները»: Ջարդերը շարունակվեցին այնքան ժամանակ, մինչև Բաքու մտավ խորհրդային զորքը:-0-
