Հայաստանի նախագահ Սերժ Սարգսյանն այցելել է Երևանում տեղի ունեցած շնորհալի պատանիների տոնական համերգին

ՀՀ նախագահ Սերժ Սարգսյանն ու առաջին տիկին Ռիտա Սարգսյանը երեքշաբթի այցելել են Սուրբ Ծննդյան և Ամանորյա տոներին նվիրված շնորհալի պատանիների համերգին:

ՀՀ մշակույթի նախարարության աջակցությամբ ամեն տարի կազմակերպվող համերգն այս տարի առաջին անգամ անցկացվում էր Կամերային երաժշտության տանը:

«Պահպանելով ավանդույթները, միաժամանակ ամեն տարի փորձելով որոշակի նորարություն մտցնել՝ այս տարի մենք կազմակերպեցինք տոնական համերգը Կամերային երաժշտության տանը», - ասել է ՀՀ մշակույթի նախարար Հասմիկ Պողոսյանը:

Համերգի շրջանակներում իրենց դասական և էստրադային կատարումները ներկայացրեցին UNICEF-ի մանկական կամերային նվագախմբի շնորհալի պատանիները՝ Սերգեյ Սմբատյանի ղեկավարությամբ: Նվագախմբի ամենակրտսեր կատարողը ութ տարեկան էր:

Բացի այդ «Ձմեռային գիշերվա երազանք» մանկական ծրագրի շրջանակներում իրենց կատարումներն է ներկայացրել մանկական էստրադային համույթը՝ Նադեժդա Սարգսյանի ղեկավարությամբ:

Համերգից հետո նախագահ Սարգսյանը հանդիպել է հանդիսավոր միջոցառման հյուրերի՝ հայկական մշակույթի ներկայացուցիչների, երաժիշտների, դերասանների, պոետների և գրողների հետ:-0-