Հայկական ընդդիմությունը պատրաստվում է վիճարկել խորհրդարանի լրացուցիչ ընտրությունների արդյունքները
ԵՐԵՎԱՆ, 12 հունվարի. /Նովոստի-Արմենիա/. Հայկական ընդդիմությունը պատրաստվում է վիճարկել խորհրդարանի լրացուցիչ ընտրությունների արդյունքները ընտրությունների ժամանակ տեղի ունեցած բազմաթիվ խախտումների պատճառով և առաջին հերթին՝ օրենսդրությանը հակասող ընտրությունների ամսաթվի պատճառով, երեքշաբթի լրագրողներին հայտնեց ընդդիմադիր ՀԱԿ-ի համակարգող Լևոն Զուրաբյանը:
«Նրանք կեղծել են ընտրությունների օրը»,- հայտարարեց Զուրաբյանը՝ հավելելով, որ ընտրությունները հունվարի 10-ին անցկացնելով, այսինքն տոնական օրերին, չի հաջողվել նորմալ նախընտրական քարոզարշավ անցկացնել:
«Մեզանից գողացել են նախընտրական քարոզարշավի ամենակարևոր ժամանակը, չէ՞ որ գաղտնիք չէ, որ նախընտրական քարոզչության ամենաթեժ պահը վերջին 15 օրն է»,- նշեց նա:
Ընդդիմության ներկայացուցչի խոսքերով, ՀՀ ընտրական օրենսդրության համաձայն, լրացուցիչ ընտրությունների վերջնաժամկետը պետք է դեկտեմբերի 25-ը լիներ:
Ըստ նրա՝ ՀԱԿ-ը պատրաստվում է ընտրությունների արդյունքները վիճարկել ԿԸՀ-ում, ինչպես նաև դատարանում և ՍԴ-ում, իսկ Հայաստանում բոլոր անհրաժեշտ ատյաններով անցնելույց հետո՝ նաև Մարդու իրավունքների եվրոպական դատարանում:
Սակայն միաժամանակ, Զուրաբյանի կարծիքով, ՀԱԿ ընտրական մեքենան մշտապես կատարելագործվում է, և այս ընտրարշավը լավագույնն էր:
Իր հերթին ընդդիմության թեկնածու Նիկոլ Փաշինյանի նախընտրական շտաբի ղեկավար Դավիթ Մաթևոսյանը նշեց, որ ընդդիմությունը ընտրություններում հաղթանակ տանելու հույս չուներ երկրում ազատ ընտրությունների բացակայության պատճառով: «Այդ ընտրությունները մեզ համար քաղաքական պայքարի միջոց էին»,- նշեց նա: --0--
