Դաշնակցությունը կշարունակի բողոքի ակցիաները հայ-թուրքական արձանագրությունների դեմ

ԵՐԵՎԱՆ, 12 հունվարի. /Նովոստի-Արմենիա/. Դաշնակցությունը կշարունակի բողոքի ակցիաները հայ-թուրքական արձանագրությունների դեմ և կփորձի թույլ չտալ փաստաթղթերի վավերացումը երկրի խորհրդարանի կողմից դրանց ներկայիս տեսքով, ասաց ՀՅԴ գերագույն մարմնի ներկայացուցիչ, խորհրդարանի պատգամավոր Արմեն Ռուստամյանը: 

«Մենք կշարունակենք բողոքի ակցիաները, քանի որ հայ-թուրքական արձանագրությունների հարցը վերջնականապես լուծված չէ: ՍԴ-ն արձանագրություններին «կանաչ լույս» տվեց և ընդամենը որոշակի հստակեցումներ մտցրեց: Սակայն հարցը լուծված չէ, և գործընթացը կշարունակվի ՀՀ Աժ-ում»,- երեքշաբթի Ռուստամյանն ասաց լրագրողներին:

ՀՀ ՍԴ-ն երեքշաբթի Սահմանադրությանը համապատասխան ճանաչեց  Դիվանագիտական հարաբերությունների հաստատման և Հայաստանի ու Թուրքիայի միջև հարաբերությունների զարգացման մասին Հայաստանի և Թուրքիայի միջև ստորագրված արձանագրությունները:

Ինչպես նշեց Ռուստամյանը, ՀՀ ՍԴ-ն փաստորեն առանց որևէ վերապահման դրական եզրակացություն է տվել արձանագրություններին: Բարդությունն ըստ նրա այն է, որ հայ-թուրքական արձանագրությունները՝ ՍԴ՝ առանց վերապահումների եզրակացության հետ միասին կուղարկվեն ԱԺ, որը նման դեպքում Կանոնակարգի  համաձայն չի կարող սեփական նախաձեռնությամբ վավերացնել վերապահումներով փաստաթղթեր:  

Ինչպես կարծում է պատգամավորը, առանց վերապահման արձանագրությունների վավերացման դեպքում փաստաթղթերը կկորցնեն իրենց նշանակությունը:

ՀՅԴ ներկայացուցիչը նշեց, որ ՀՀ խորհրդարանը կարող է վերականգնել արդարությունն ու որոշակի փոփոխություններ մտցնել Կանոնակարգի մեջ՝ հնարավորություն տալով Ազգային Ժողովին սեփական նախաձեռնությամբ վավերացնելու վերապահումներով միջազգային փասատթղթերը, այն դեպքում, երբ ներկայումս վերապահումներով փաստաթղթերի վավերացման մասին առաջարկություն անում է նախագահը:  

«Ավելի ճիշտ կլիներ, եթե նախագահը առաջարկեր այդ վերապահումները»,- ասաց նա:

Ռուստամյանն ընդգծեց, որ Հայաստանը կարող է նաև էական դիվանագիտական քայլեր ձեռնարկել՝ ապացուցելով, որ Թուրքիան իրավունք չունի խոսելու նախապայմանների դիրքից և զգալիորեն շեղվել է գործընթացի բնական ընթացքից:

«Մենք չպետք է տարադրամ դառնանք գերտերությունների խաղում, այլ պետք է պաշտպանենք մեր շահերը»,- հայտարարեց Ռուստամյանը:  --0--